Биыл елордада ауқымды «Astana Innovations Challenge» стартап-марафоны іске қосылған болатын. Іс-шараны Астана қаласы әкімдігі атынан «Астана Innovations» АҚ MOST бизнес-инкубаторымен бірлесе отырып, «Шеврон» компаниясының қолдауымен ұйымдастырды. Бұл жас инноваторлар мен өнертапқыштарға арналған жоба. Яғни, мұндай шаралар арқылы жас дарындардың үздік идеяларын жүзеге асыруға мүмкіндік аша отырып, жастарды қала өмірін жақсартуға үлес қосуға шақырады. Жоба аясында жылдың соңына дейін тақырыптық бағыты әртүрлі 4 стартап уикэнд және 2 хакатон ұйымдастыру көзделген. Жексенбі күні соның алғашқы уикэндті қорытындыланды.
Шараның тақырыбы коммуналдық шаруашылықтың, көлік пен қала экологиясының түйткілді мәселелері саласындағы инновациялық шешімдер ойлап табумен байланысты болды. Қорытындысында ең перспективалы деген 3 стартап-жоба анықталып, олар өзара 500 000 теңге жүлде қорын бөлісті. Сонымен қатар, жеңімпаз-командалар MOST бизнес-инкубаторы негізінде қарқынды акселерация бағдарламасынан өту, жобаны бизнес-жебеушілер қауымдастығы мүшелері алдында таныстыру, қаржыландыруды алғанға дейін жобаның сүйемелденуі және жобаларды елордада енгізу мүмкіндігін алды.
Бірінші орынды мемлекеттік бюджеттің электр энергиясын төлеуге кететін шығыстарын азайту туралы мәселені шешуге бағытталған «Дербес көше жарығы» жобасымен «Sun project» командасы иеленсе, екінші орынды «Жаяу жүргіншілер жолынан мұзды жылдам әрі ұқыпты алып тастауға арналған жинақы механикаландырылған құрылғы» жобасын таныстырған «Ice Killers» командасы жеңіп алды. Үшінші орын «Қалдықтарды жинауды автоматтандыру жүйесі» жобасымен «Tazalyk» командасына бұйырды. Сонымен қатар, Астана қаласының әкімі Ә.Исекешевтің бастамасымен ақылды үй, ПИК, агроөнеркәсіптік кешен жүйелерін автоматтандыру бойынша жобаларды іске асыратын «Бірегей басқару модулі» жобасын таныстырған «Double bro’s» командасына арнайы жүлде беру туралы шешім қабылданды.
Қорытынды сөзінде Астана қаласының әкімі «Қазақстанның Үшінші жаңғыруы: жаһандық бәсекеге қабілеттілік» атты Мемлекет басшысы Жолдауының іске асырылуына ықпал ететін мұндай іс-шараларды өткізудің маңыздылығын, сондай-ақ, Қазақстанның инновациялық дамуындағы жас ұрпақтың белсенділігі жоғарылығын ерекше атап өтті.
Динара БІТІК, «Егемен Қазақстан»