«Жасыл ел» бағдарламасы жазғы маусым кезінде студент-жастарды жұмыспен қамтуға үлес қосып келеді. Павлодар өңірінде биыл 2 мыңнан астам жас бағдарлама аясында еңбек етпек. Жастар қазір заманға сай жаңашылдықты жақсы көреді, өмірдің әр саласына «Жасыл елдің» ізін қалдырғысы келеді. Мысалы, былтыр жастардың «Су асты» жасағы Баянауылдағы Жасыбай көлінің түбін тазалау жұмыстарына, археологиялық топпен бірге Лебяжі ауданындағы Бөрілі көлінің маңында қазба жұмыстарын жүргізуге қатысты. Сонымен бірге «Креативный Павлодар» аэрографиялық жасағы, «Жәрдем тайм» қалпына келтіру жасағы, «Жасыл ел бақшалығы» саяжай жасағы және құрылыс жасағы іске кірісті. Жаз бойы еңбек жасақтары қатарында 2500 «жасылелдік» студент еңбек етеді. Олардың қатарында оқушылар да бар. Студенттер, жұмыссыз жастар, бәрі бірге құрылыста және әлеуметтік нысандарда еңбек етуде, абаттандыру мен көгалдандыруға, саябақтар мен өзендерді тазалау жұмыстарына қатысуда.
Ал, «Жасыл ел» қалалық штабының командирі Оразалы Сәрсеновтің айтуынша, «Жасыл ел» облыстық еңбек жасақтары қаладағы тұрғын үй-коммуналдық шаруашылығы бөлімімен бірлесіп сенбіліктер өткізеді. Тіпті 400-ден астам қап қоқыс жинап беріпті. Сондықтан, сенбілікке қатысқан қыз-жігіттер әлеуметтік желідегі парақшаларына жинаған жер емес, қоқыс тастамайтын жер таза екенін білу туралы жазды.
– Әрқайсымыз қоршаған орта, туған жеріміз үшін жауапкершілігімізді сезінуіміз қажет, бұл – біздің үйіміз, дейді «жасылелдіктер».
Студент жастардан құралған құрылыс жасақтары қазір облыс орталығындағы «Жәрдем» ЖШС-мен бірлесіп, «Нұрлы жол» бағдарламасының жаңадан салынып жатқан нысандарында еңбек етуде. Ал, биылғы жазда «Жасыл ел бағбаншылығы» деп аталатын жастар еңбек жасағының тағы бір жаңашылдығын естідік. Жастар мүгедек жандарға арнап картоп отырғызды. Белсенділердің айтуынша, студенттер жаз бойы еккен өнімдерін күтіп, баптап, күзде мүгедек жандардың үйлеріне апарады. Бұл шара «Жасыл ел» жобасы аясында жас ұрпақты еңбекті бағалауға үйретеді. Еңбекақылары – 65-70 мың теңге. Сондықтан, жастар жасағының қатарында еңбек еткісі келетіндер көбейері сөзсіз. «Жасыл елдің» екінші кезеңі шілде айында басталды. Жастар басқармасының басшысы Наталья Нефедованың айтуынша, «Жасыл ел» еңбек жасағы жыл бойына, демалыссыз еңбек етеді. Ендігі мәселе – жазғы маусымда еңбек жасақтарында жүрген жастарға арнайы киім қажеттігі айтылуда. Сондықтан, басқарма бірыңғай еңбек формасына тапсырыс бермекші. Өйткені, «Жасыл ел» жасағының жастары, студенттер қыста қар тазалау жұмыстарына, көктем, жаз күз мезгілдерінде де науқандық жұмыстарға қатысуда. Жазғы маусымда экологиялық, құрылыс, үгіт-насихат тәрізді отрядтарда еңбек етсе, күзде егін жинау, қала ішіндегі бақтарда жапырақтарды жинау мен қоқыстардан тазарту жұмыстарына жіберіледі. Жастар еңбек жасақтарының арасындағы республикалық деңгейде біздің павлодарлық «Жасыл ел» студент-жастар жасағы жыл сайын үздік көрсеткіштерге ие боп келеді.
Фарида БЫҚАЙ, «Егемен Қазақстан»
ПАВЛОДАР
Суретті түсірген Айгүл Есенәли