Өзбекстандық велосаяхатшы Хурсанд Шеров Астанаға табан тіреді. Мәскеуге бара жатқан ол ЭКСПО-2017 көрмесін тамашалау үшін арнайы аялдаған. «Қазір бүкіл әлем Қазақстанға назар аударып, Астананы іздейтін болды. Көппен бірге біз де бұрылдық», дейді ол.
2240 шақырымды артқа тастаған саяхатшы енді Қазанға жол жүрмек. Содан кейін Мәскеуге бағыт алады. Ол әнші Мүсілім Магомаевтың 75 жылдық торқалы тойын осылай атап өтпек болған. Бұл – Хурсанд Шеровтің үшінші велосаяхаты. Бұған дейін Алтай, Сібір арқылы Қытай асқан. Ташкенттен Мәскеуге тіке тартқан кезі де бар. «Алдымен Бішкекке тоқтадым. Бірақ осы жаққа асықтым. Мереке құшағындағы Астананы көргім келді. Міне, аман-есен жеттім. Жұрт той тойлап жатыр. Бәрі маған құрметпен қарайтын секілді. Оларға Өзбекстанның сәлемін жеткіздім. ЭКСПО-ға құтты болсын айтамын. Велоспортпен сегіз жылдан бері жаттығамын, енді сейіл құрып жүрмін», деп ағынан жарылды Х.Шеров.