Теңіз жағалауында ҚР ҰҚК «Батыс» ШҚ басқармасы эстафета символын аймақтық Жағалау күзеті басқармасына табыстады. Бұл салтанатты сәтке 250 теңізшіні қосқанда барлығы 350 жеке құрам, әскери кемелер мен тікұшақтар қатысты. Теңізде әскери кемелер сап құрса, тікұшақтар көк аспанда қалықтады, ал жағалауда шекарашылар тұрғындарға қоян-қолтық ұрыс көріністерін көрсетті.
ҚР ҰҚК аймақтық Жағалау күзеті басқармасының бастығы полковник Ә.Каюповтың айтуынша, жағалау күзетінің гарнизон құрамы Қазақстанның 2480 шақырым шекарасын күзетсе, оның 1595 шақырымын теңіз жағалауы құрайды.
«Біздің мақсатымыз – мемлекеттік шекараның бұзылуына жол бермеу және еліміздің аймақтық тұтастығын қамтамасыз ету, сондай-ақ оның биологиялық ресурстарын қорғау», – дейді полковник.
ҚР ҰҚК шекара қызметінің 25 жылдығына арналған эстафета 2017 жылы 18 тамызда Астана қаласында өз мәресіне жетеді.
Гүлайым ШЫНТЕМІРҚЫЗЫ, «Егемен Қазақстан». Фото: Серік МАЙЕМЕРОВ Маңғыстау облысы