Еліміздің Ұлттық спорт түрлері қауымдастығы өкілдерінің айтуынша, бүгінде өңірлерде шөген ойнайтын шағын командалар бар. Алдағы уақытта солардың басын біріктіріп, ат спортының осы түрін дамыту жоспарда тұр. «шөген спортынан елордада өткен бұл кездесу алғаш рет ұйымдастырылды. Матчқа әр командадағы 3 ойыншыдан барлығы 6 спортшы қатысты. Ойын 3 бөлiмнен тұрады, ал әр бөлiмi 7 минутты құрайды. Ойынға қатысқан жылқылардың барлығы өзiмiздiкi», дейді шөгеннен Қарағанды қалалық қауымдастығы басшысы Асланбек Мешков. Маманның айтуынша, Аргентинада бұл ойын бірнеше мыңдық стадиондар жинайды. Қазақстанда да дамуы тиіс, себебi қазақтар ежелден жылқыны қастерлейді. Аргентиналықтар да бұл жануарды жоғары бағалайды.
Елiмiзде аргентиналық жылқы тұқымын будандастыру жоспарда бар көрінеді. Оның орташа бағасы 10 мың еуродан басталады екен. «Көкпар-Астана» жылқы спорты клубы» ЖШС директоры Аманжол Хасенов қазiрдiң өзінде кез келген адам қаласа клубқа келiп, шөгеннің секциясына тегiн қатыса алатынын айтты. «Онда көкпар ойнайтын 10 шабандоз дайындық үстінде. Көкпар ойнағандар шөген ойынын тез үйреніп алады. Оның техникасын меңгеруге әрі кеткенде 2-3 ай ғана уақыт қажет. Балалар 11-15 жастан бастап ойнаса, 60-70 жастағы қариялар да спорттың бұл түрімен айналыса алады», дейді А.Хасенов.
«Ойын керемет өтті, барлығы жоғары деңгейде ұйымдастырылған. Мұндағы аттар көкпарға машықтанған. Бірақ ат спорты болғандықтан, қазақстандықтар шөгенді тез меңгеріп алады деп ойлаймын. Сондықтан өздерін әлемдік деңгейде көрсетулеріне мүмкіндіктері мол. Ал біз тәжірибе алмасуға әрқашан әзірміз», дейді аргентиналық команданың ойыншысы Фернандо Швайцер. Ойынды тамашалауға Ақпарат және коммуникациялар министрі Дәурен Абаев, Аргентинаның БАҚ және қоғамдық пiкiр министрі Эрнар Ломбарди және басқа да лауазымды тұлғалары келдi.