Қос оқиға да Голливуд сериалдарындағы қанды қасапты еске түсіреді. Екі жасөспірім өздері құралыптас замандасын таяққа оңдырмай жығумен шектелсе бір сәрі. Травматикалық тапаншамен бірнеше рет атып, 39 секундқа ғана созылған төбелес барысында зәбір шегуші дене жарақатын алған.
Ал, екінші оқиға топтық жаға жыртысуға жалғасып, шолақ мылтықтан атылған оқтан 19 жастағы Ербол Хамитов деген колледж студенті жараланып, ауыр жағдайда ауруханаға жеткізілген.
№ 1 қалалық аурухананың бас дәрігері Галина Маметованың айтуынша, науқастың бір аяғын тізеден кесуге тура келген. Халі әлі мәз емес. Басы жарылып, тістері сынған. Жапа шегушінің әкесі Ғалымкерей Құсайыновтың сөзіне қарағанда, ұсталғандардың арасында қару қолданушылар жоқ көрінеді. Қашып кетсе керек. Ол нағыз қылмыскерлер жауапкершіліктен сытылып кете ме деп алаңдайды.
Облыстық ішкі істер департаментінің баспасөз қызметі күдіктілердің ұсталғаны, Қылмыстық кодекстің 293-ші, 99-шы баптары бойынша («Бұзақылық» және «Кісіге қастандық жасау»), қылмыстық іс қозғалғаны жөнінде мәлімдеме таратты.
Өмір ЕСҚАЛИ, «Егемен Қазақстан»
Солтүстік Қазақстан облысы