Бүгінде еліміз өзінің әскери әлеуетін, қорғаныс қабілетін дүниеге танытты. Осы мақсатта Қордай ауданының «Отар» 40-шы әскери базасында халықаралық армиялық ойындардың ашылу салтанаты өтті. Аталған шараға Қазақстан Республикасының Қорғаныс министрі, генерал-полковник Сәкен Жасұзақов арнайы келіп қатысты. «Армиялық халықаралық ойындарды өткізу шынайы жауынгерлік бауырластық пен адами достықтың негізі болып табылады және Елбасы – Қазақстан Республикасы Қарулы Күштерінің Жоғарғы Бас қолбасшысы тарапынан лайықты қолдау тауып келеді. Армиялық ойындар көлемді әлемдік спорттық біріншіліктерден еш айырмасы жоқ халықаралық ауқымдағы ірі іс-шара. Біз үшін оны ең жоғары деңгейде Қазақстанда өткізу үлкен абырой», деді министр өз сөзінде. Салтанатты шарада қазақстандық барабаншылар мен домбырашылардың сүйемелдеуімен Қазақстан Республикасы Қорғаныс министрлігінің әскери оркестрі өнер көрсетті. Сонымен қатар, «Арлан» бронды-дөңгелекті машиналарының, «Т-72 Б» танктерінің, жалпы қазіргі заманғы жауынгерлік техникалардың да көрсетілімі болды. Сондай-ақ, көпшілік назарына десантшылар ротасының орындауында қарумен қол жекпе-жегі ұрысының көрсетілімі ұсынылды. Еліміздің әскерінің жауынгерлік ұшақтары мен тікұшақтары пилотаждық тобының әуе шоуы армиялық ойындардың ашылуының шарықтау шегі болды. Армиялық халықаралық ойындар шеңберіндегі «Артиллериялық атыс шебері», «Мергендік шебі» және «Ұшқышсыз ұшу аппараттары есептоптарының жарысы» байқаулары Қазақстанда 1-9 тамыз аралығында өтетін болады. Жарыстарға қатысу үшін елімізге әлемнің 18 елінен 400-ге жуық әскери қызметші келді. Әскери қызметшілер 28 команданың құрамында өнер көрсететін болады.
Хамит ЕСАМАН, «Егемен Қазақстан»
Жамбыл облысы