Президент Н.Назарбаевтың жыл сайынғы халыққа Жолдауын қалың бұқара арасына кеңінен насихаттау − бәріміздің міндетіміз. Осы мақсатта Үкімет мүшелері мен Парламент депутаттарынан, облыс пен аудан және ауыл әкімдігінен, сондай-ақ мекеме қызметкерлері тарапынан үгіт-насихат тобы құрылып, әртүрлі іс-шаралар өтеді. Мен де ауылымыздағы ақпараттық-насихаттық топтың мүшесімін және оны мақтан тұтамын.
Жолдауда атап көрсетілген міндеттер мен тапсырмалар ауданымызда, қала берді ауылымызда жүзеге асып жатқандығына куә болып жүрміз. Атап айтқанда, былтыр Шардара ауданы Достық елді мекеніндегі 400 орындық мәдениет үйінің ғимараты 108 млн теңгеге күрделі жөндеуден өтті. «Достық» жалпы орта мектебінде 2009 жылы 9,5 млн теңгеге, 2012 жылы 32 млн теңгеге, 2016 жылы 19,456 млн теңгеге күрделі жөндеу жұмыстары облыстық бюджеттің қаржыландыруымен жүргізілді. Ескі 140 орындық балабақша 2014-2015 жылдары республикалық, облыстық бюджеттің есебінен бөлінген 2 млн 95 мың теңге қаржыға ағымдағы жөндеуден өткен.
Елді мекенімізде орталықтандырылған ауыз су құбыры бар. Судың сапасы қанағаттанарлық. 1978 жылы салынған нысанды «Шардара ауыл сервис» ММК 2011 жылы облыстық бюджеттен бөлінген 78 млн 644 мың теңгеге қайта құрылымдаудан өткізді. Ауылдың ішкі көшелерінің жалпы ұзындығы 1991 жылға дейін 935 метрді құраса, ол көрсеткіш бүгінде 1505 метрге жетіп отыр. Көшелерге қиыршық тас, асфальт төселіп, жаңартылып толығымен орташа жөндеуден өтті.
Қазіргі таңда ауылдың ішкі жүйелерін электрлендіру бойынша 4 млн 43 мың теңгеге ЖСҚ дайындалуда. Ауылымызда баспана мәселесі де оңтайлы шешіліп келеді. Қазір тұрғын үй алабына бөлінген жер учаскесінің аумағында жасалынып жатқан бас жоспардың оңайлатылған сызбасы бекітіліп, толығымен орындалды. Бұдан бөлек, жаңадан коммуналдық 3 тұрғын үйдің құрылыс жұмыстары жүргізілуде, келер жылдың наурыз айында аяқталады деп күтілуде. Ал ауылымызда өтетін мәдени іс-шаралардың саны да жеткілікті. Мінеки, Елбасымыздың Жолдауларында айтылған мәселелер біздің ауылымызда да осылайша қарқынды түрде жүзеге асып келеді.
Қорыта айтқанда, жаңа жағдайдағы рухани жаңғыру баршамыздан жаһандық өзгерістерге және жаңашылдықтарға дайындықты және ұмтылысты қажет етеді. Өйткені біз айрықша серпінділікпен жылжып жатқан зымыран уақытта өмір сүрудеміз. Жалпы, бағдардан айқын көзқарас, жаһандану дәуірінде қалай да ұлт ретіндегі өз ерекшелігін сақтап, даму мұратынан туған күрескерлік, жаңашылдық аңғарылады. Осы қасиеттер намыс туын үнемі тік ұстайтын қазақ деген халықтың әрбір азаматының бойына дарыса, нұр үстіне нұр болар еді.
Нұрбас ИСА
Оңтүстік Қазақстан облысы,
Шардара ауданы,
Достық ауылы