Достық үйінде Дін істері және қоғамдық келісім министрлігінің қолдауымен облыстық Қазақстан халқы Ассамблеясы мен «Гуонлен» жастар орталығы «Қоғамдық келісім және ұлттық бірліктің қазақстандық үлгісі» деген тақырыпта аймақтық ғылыми-тәжірибелік конференция ұйымдастырып, ұлтаралық қарым-қатынастарды жетілдіру, тіл, дін, әлеуметтік біртектілік, бейбітшілік, руханият, мәдениет мәселелері жан-жақты талқыланды.
Алқалы басқосуды облыстық Қазақстан халқы Ассамблеясының хатшылық меңгерушісі Наиль Салимов ашып, Достық үйінде – 23, жергілікті жерлерде 100-ден астам этномәдени бірлестік жұмыс істейтінін, олардың этносаралық, конфессияаралық бірлігімізге жан-жақты қолдау көрсетіп, өлшеусіз үлес қосып келе жатқанын атап өтті. Ассамблея қызметінде жастар және үкіметтік емес ұйымдардың да алатын орны ерекше. Олар өңірдің саяси-мәдени өміріне белсене араласады деді ол.
Солтүстік Қазақстан мемлекеттік университетінің доценті, заң ғылымдарының кандидаты Гүлбақша Мұсабаева жергілікті тәжірибеге сүйене отырып «Қоғамдық келісім мен жалпыұлттық бірліктің қазақстандық үлгісін дамытудағы Қазақстан халқы Ассамблеясының рөлі» деген тақырыпта баяндама жасады. Ол қоғамдық тепе-теңдікті, саяси тұрақтылықты сақтау, Мемлекет басшысы айқындап берген міндеттер мен мақсаттар жолында жұмыла еңбек ету ұстанымдарына екпін түсірді. «Барбанг» күрдтер қауымдастығы облыстық филиалының төрағасы Рашид Надиров тарихи маңызды құжат саналатын жолдауларда ел бірлігінің, жарқын болашағымыздың дамуына әркез басым басымдық берілетінін, бұл орайда жас буын бойына тарихымызды, құндылықтарымызды ұлықтау, отанды сүю қасиеттерін ұялатудың маңыздылығын жеткізді. «Коперник» облыстық поляк мәдени орталығының төрайымы Валентина Корнева өз ойын Елбасының «Болашаққа бағдар: рухани жаңғыру» бағдарламалық мақаласында айтылған қазақстандық патриотизм мәселесімен сабақтастырды. Кез келген халықтың қуаты – оның бірлігінде. Қазақстан – этносаралық келісім саласында тәжірибесі мол, бірегейлік пен біртектіліктің қайталанбас моделін қалыптастырушы ел. Біздің артықшылығымыз да, күшіміз де – біртұтастығымызда. Сондықтан, осы бір азаматтық қағидаттарды одан әрі нығайту «Мәңгілік Ел» идеясына негізделуі тиіс, дей келіп, бірлік пен келісім мұраттарын насихаттау жолында ұйым тарапынан атқарылған шаралар жайлы әңгімеледі.
Өмір ЕСҚАЛИ, «Егемен Қазақстан»
Солтүстік Қазақстан облысы