Халықтық коммунистер фракциясының жетекшісі өз сөзінде Парламент Мәжілісінің өткен сессиясында атқарылған шаруалар жайлы айта келіп, сайлаушыларды партияның заң шығармашылық жұмысынан хабардар етті. Бұл ретте депутат конституциялық реформа шеңберінде заңдарға енгізілген өзгерістер жайын қозғады. Мемлекет басшысының «Қазақстанның үшінші жаңғыруы: жаһандық бәсекеге қабілеттілік» Жолдауының негізгі ережелері мен «Болашаққа бағдар: рухани жаңғыру» атты мақаласында көтерілген мәселелер туралы да өз ойын ортаға салды және фракцияның жұмысымен де таныстыра кетті.
Атап айтқанда, Владислав Косарев жиналғандарды партияның заңнамалық бастамаларымен таныстыра отырып, өзге де жұмыстарының қырын ашып көрсетуге тырысты. Депутат сайлаушылармен ауыл шаруашылығындағы өзгерістерге көңілі толатындығымен де бөлісуді жөн көрді. Депутаттың жеке қабылдауына 8 адам жазылды. Олар өңірдегі өздерін толғандыратын мәселелерді ортаға салды. Щучье қаласы әкімінің орынбасары А.Ахметова көтерілген мәселелер бойынша тиісті шаралар атқарылып жатқандығын айтты.
Асқар ТҰРАПБАЙҰЛЫ, «Егемен Қазақстан» Ақмола облысы