Зауытта болған кезде Ж.Ахметбеков үш цехтың металлургтерімен кездесіп, оларға Президенттің «Қазақстанның үшінші жаңғыруы: жаһандық бәсекеге қабілеттілік» тақырыбындағы Жолдауын түсіндіріп, жұмыскерлерді алаңдатып отырған мәселелер тұрғысында пікірлесті. Бұл күнде өнеркәсіптің аса зиянды салаларында жұмыс жасайтын жұмыскерлердің еңбекақысын көтеру, Қазақстанның өнеркәсіптік аймақтарының экологиясы, сонымен қатар, «Құрметті металлург» белгісін қайтару – балқаштықтар үшін түйткілді түйін. Кездесу барысында металлургтер халық қалаулысының алдына осы тектес сұрақтарды қойды. Депутат әр жұмыскердің пікірін мұқият тыңдап, оларды толғандырған мәселелер жедел шешімін табуы үшін аянып қалмайтынын жеткізді.
Металлургтер Мәжіліс депутатына олардың қиыншылықтарына назар аударғаны үшін алғыс білдіріп, «Халық коммунистері» фракциясы елдің жоғары заңнамалық органында бұрынғыдай қарапайым адамдардың мүдделерін қорғайтынына үміт білдірді.
Мирас АСАН, «Егемен Қазақстан» Қарағанды облысы, Балқаш қаласы