Ұлттық әскери-патриоттық орталықта ұйымдастырылған салтанатты шарада шекара қызметінде ұзақ жылдар еңбек етіп, ел тыныштығы үшін маңдай терін төккен ардагерлерге сый-құрмет көрсетілді. Сондай-ақ, осы күнде міндетін мінсіз атқарып, әріптестеріне үлгі болған үздік шекарашылар мен саланың мақтаулы мамандары да басшылық тарапынан түрлі марапаттарға ие болды.
Кәсіби мерекенің 25 жылдығы қарсаңында республика аумағындағы шекаралық бекеттерді шарлаған аталған мекеменің мерейтойлық рәмізі Астанаға қайта оралды. Оны салтанатты жағдайда қабылдап алған Ұлттық қауіпсіздік комитеті төрағасының орынбасары-Шекара қызметінің директоры генерал-майор Дархан Ділманов Тәуелсіздіктің алғашқы жылдарында жаңа қалыптасқан мемлекеттің шекаралық қадасын қағып, тұғырын нықтауда, айқын мақсат, нақты тапсырмаларды жүктеуде Елбасы Нұрсұлтан Назарбаевтың еңбегі ерен екендігін ескертіп өтті.
«Кеңес кезеңінде Қазақстанның шығыстағы көршісі Қытай елімен 1 500 шақырымдай ғана шекаралық аумағы болып, соны жіті бақылауда ұстады. Ал Тәуелсіздік алғаннан кейінгі жылдарда бұл көрсеткіш көлемі он бес мың шақырымнан асып түсті. Жас мемлекет үшін осыншама байтақ жерді көздің қарашығындай қорғау мен сақтау оңай шаруа емес екені белгілі еді. Мемлекет басшысы айқындап берген бағыт-бағдарлармен жүре отырып, біз бүгінгідей тамаша жетістіктерге жеттік. Қай мемлекетті алсақ та, оның әлеуеті ұлттық қауіпсіздік қызметінің жай-күйімен ұштасатындығын ескерсек, біздің бүгінгі биіктеріміз бір белес болып табылады», деді ол.
Д.Ділмановтың айтуынша, өзі жетекшілік ететін сала мамандары бұл күнде соңғы үлгідегі заманауи қару-жарақ пен түрлі техникалармен қамтамасыз етіліп, қатарлары әскери міндеттерін мінсіз орындай алатын кәсіби шеберліктері шыңдалған тәжірибелі мамандармен толыққан. Қазақстан әлемдегі құрлықтық шекарасы ауқымды елдердің қатарында. Ұшқан құстың қанатын талдырып, тұлпардың тұяғын тоздыратын Ұлы дала елінің мемлекеттік шекарасын күзету ісінің шеберлері биылғы жылдың алғашқы жартысын жоғары көрсеткіштермен қорытындылаған. Атап айтқанда, алты ай ішінде ел шекарашылары 12 мыңнан астам мемлекеттік шекара құқын бұзу оқиғасын тіркеген. Сол сияқты есірткі заттарын тасымалдаудың астыртын жолдарын анықтау ісінде де мамандардың әбжіл әрекетті айқын көрінген.
«Ауыз толтырып айтарлықтай биылғы жетістіктеріміз аз емес. Оның бәрі де қатарымыздағы сенімді серіктес, білікті әріптестеріміздің ерен еңбегінің нәтижесі. Сондықтан да 1 280 шекарашыны кәсіби мереке күні қарсаңында салтанатты түрде марапаттағанды жөн санадық. Олардың кейбірінің мерзімінен бұрын шені өссе, енді бірінің кеудесіне мерекелік төсбелгі тағудамыз», деді Д.Ділманов.
Нұрлыбек ДОСЫБАЙ, «Егемен Қазақстан»