Қазақстан Республикасы Парламенті Мәжілісінің Төрағасы Орал Мұхамеджанов бастаған парламенттік делегация Парламентаралық Одақ Ассамблеясының 125-ші отырысына қатысады. Бұл парламенттік форум Берн қаласында (Швейцария) қазанның 16-сы мен 19-ы аралығында өтеді.
Басқосудың бағдарламасында басқа да парламенттік шаралармен қатар, Ассамблея шеңберінде «Ядролық қару – апатқа әкелетін жол» тақырыбында пікірталас өтетіні көзделуде. Пікірталастар кезінде Орал Мұхамеджанов сөз сөйлейді деп күтілуде.
Сондай-ақ бағдарламада Қазақстан Республикасы Парламенті Мәжілісі Төрағасының Парламентаралық Одақ Ассамблеясының форумына келген шетелдік делегация басшыларымен, оның ішінде Германия Бундестагының төрағасы Норберт Ламмерт, Жапония Парламенті Өкілдер палатасының спикері Такахиро Йокомичи және Швейцария Конфедерациясы Парламенті Ұлттық кеңесінің президенті Жан-Рене Жерманьемен екіжақты кездесулер өткізетіні де қарастырылған, деп хабарлады Мәжілістің баспасөз қызметі.