Шығыс Қазақстан мен Түркияның Бурса провинциясы бауырлас аймақтарға айналды
Жақында Шығыс Қазақстан облысының әкімі Бердібек Сапарбаев Түркияның экономикалық жағынан ең бір жақсы дамыған Бурса провинциясында ашылған бизнес-форумның жұмысына қатысты.
Бурса – химия өндірісі, жиһаз жасау және құрылыс саласы жақсы дамыған ірі өнеркәсіптік аймақ. Ол Түркиядағы тоқыма өнеркәсібінің орталығы ретінде де танымал. Мұнда автомобиль және мәшине жасау, металлургия салаларының өндірістік буындары да орналасқан. Аймақта «Рено», «Фиат» жеңіл көліктерін, оларға қосалқы бөлшектер, орта қуатты жүк мәшинелерін шығаратын зауыттар бар. Түркия автомобиль экспортының 75 пайызына жуығын құрайтын Бурса – елдегі ірі автомобиль экспорттаушы орталық.
Кездесу кезінде Бердібек Сапарбаев пен Бурса провинциясының губернаторы Шахабаттин Харпута өзара сауда-экономикалық серіктестік, сондай-ақ, Бурса мен Шығыс Қазақстан облысы арасында келісілген бауырластық қарым-қатынасты одан әрі дамытудың болашағы жайында кеңінен әңгіме қозғады. Бурса қаласының мэрі және сауда-өнеркәсіп палатасы кеңесі төрағасының орынбасарымен де келелі әңгіме болды.
Өндіріс саласындағы әріптестікпен қоса, форумға қатысқан Шығыс Қазақстан облысының бизнесмендерін түрік кәсіпкерлерінің туризм саласындағы аса бай тәжірибелері де қызықтырды. Бурса аймағы тау шаңғысы курорттарымен әйгілі, табиғаты жағынан біздің облыспен ұқсас жерлері аз емес. Олардың жоғары дамыған инфрақұрылымы Шығыс Қазақстанға өте-мөте қажет-ақ.
Бизнес-форум аяқталған соң оған қатысушылар сурет көрмесімен танысып, Шығыс Қазақстан өнер ұжымдары әзірлеп апарған концертті тамашалады. Шығысқазақстандықтар сондай-ақ, Түркиядағы 220-дан аса кәсіпорын орналасқан Бурса қаласының өнеркәсіп аймағымен мұқият танысты.
Оңдасын ЕЛУБАЙ, Өскемен.