Таяуда Қарағандыда Сыбайлас жемқорлыққа және көлеңкелі экономикаға қарсы іс-қимыл стратегиясын жүзеге асыру бойынша Арнайы мониторингтік топтың отырысы өтті. Аталған орган Мемлекеттік қызмет істері және сыбайлас жемқорлыққа қарсы іс-қимыл агенттігінің Қарағанды облысы бойынша департаменті жанында жұмыс атқарады.
Жиын барысында айтылғандай, Қарағанды облысының мемлекеттік органдарының қызметтік көліктеріне арнайы эмблемалар орнату бастамасы республикада құпталды. Бұл тәжірибені еліміз бойынша қолдану ұсынысы жасалды.
– Арнайы мониторингтік топтың кейінгі отырысында мемлекеттік органдардың қызметтік көліктерінде ерекшелік белгісін қою мәселесі қарастырылды. Қала және аудан әкімдеріне қызметтік көліктерге айрықша белгі орнатуды қамтамасыз ету ұсыныстары жасалды, – деді Арнайы мониторингтік топтың жетекшісі Ермек Әбілдин.
Оның айтуынша, бүгінгі таңда көптеген әкімдіктер мен басқармалар ерекшелік белгілерін орнатқан. Алайда ол жаңашылдықты елемегендер де бар. Олардың қатарында – білім басқармасы, Абай және Нұра аудандарының, Саран қаласының әкімдіктері бар.
– Кей мемлекеттік органдар белгілерді орнатқандарын растайтын материалдар жіберген жоқ. Ол дегеніміз, аталған шара тек қағаз жүзінде орындалуы мүмкін дегенді білдіреді. Айта кетейік, 2017 жылдың 7 қыркүйегінде өткен республикалық Арнайы мониторингтік топтың хаттамасында біздің бастамамыз республиканың барлық орталық және жергілікті атқару органдарына ұсынылды, – дейді Е.Әбілдин.
Топ мүшелері жергілікті полиция қызметімен бірігіп ерекшелік белгілерінің орнатылғанын тексеру бойынша рейд өткізуді ұсынды. Отырыста сонымен қатар 2015-2020 жылдарға сыбайлас жемқорлыққа қарсы стратегияны жүзеге асыру бойынша үш жылдықта жасалатын шаралар жоспары талқыланды.
Мирас АСАН, «Егемен Қазақстан» Қарағанды облысы