Қазақстан-Армения – 0:1 «Астана-Аренада» Қазақстан – Армения арасындағы кездесудің бірінші таймы аяқталды.
Екі құрама бір-бірін аңдысып жатпай, бірден шабуылға көшті. Алғашқы болып біздің Роман Мұртазаев ұрымтал сәтте баспен соққы жасап үлгерді. Артынша бір кездері «Ақтөбе» сапында доп тепкен Пизелли сол аяқпен шірене теуіп, Лорияны сынап көрді. Қақпашымыз қиналса да допты жұдырықпен қайтара алды. Артынша қонақтар сапынан Малакян мен Симонян бір-бір реттен допты қақпамызға бағыттағанмен, бұл жерде Лория өз орнынан табыла білді.
Бірінші таймның орта тұсынан бастап қазақ жігіттері ойынды өз қолдарына қанша алғысы келгенімен, Мхитарян бастаған Армения құрамасы ондай мүмкіндік бермеді. Керісінше, қонақтардың кейбір ойыншыларының деңгейі біздің футболшылардан анағұрлым жоғары екені байқалып тұрды. Генрих Мхитарянның өзі неге тұрады?! Қорғаушыларымызды шыр көбелек айналдырып жүрген «Манчестер Юнайтед» ойыншысы 26-минутта Лориямен жекедара шығып, допты қақпашымыздың үстінен асыра салды. Есеп – 1:0, армяндардың пайдасында.
Осы голдан кейін біздің жігіттердің қарқыны бәсеңдегені анық байқалды. Есесіне қонақтар шабуыл үстіне шабуылды үдете түсті.
Алмас МАНАП, «Егемен Қазақстан»