Астанаға әлемнің білім саласындағы айтулы спикерлері келді

Екі күнге созыл­ған жиында әлемнің әр түк­пірінен келген ғалымдар мен лекторлар заманауи іргелі білім беру мәселелері туралы ой-па­йымдарын ортаға салды. Кон­ференцияға АҚШ, Ұлы­британия, Сингапур, Ресей, Аустралия, Швейцария, Өзбек­стан және басқа да елдер мен Қазақстанның барлық өңірінен мыңнан астам ғалымдар мен мұғалімдер келді. Алдымен есімдері әлемге таныс синга­пур­лық Он Сен Тан, амери­ка­лық Паси Салберг, фран­ция­лық Юри Белфали, кана­да­лық Гордон Ньюфелд сияқ­ты белді спикерлердің дәріс­тері­мен басталған конферен­ция жұмысы әртүрлі фор­маттағы презентациялар мен панелдік пікірталастарға, постер-сессияларға, дөңгелек үстелдерге жалғасты. Сондай-ақ білім беру ресурстарының көрмесі ұсынылды. Ал «Ру­ха­ни жаңғыру» бағдарла­ма­сына Парламент депутаттары­ның қатысуымен арнайы бөлім ұйымдастырылды. Конференцияның беташары болған Атырау қаласындағы Назарбаев зияткерлік мектебі оқушыларының «Көлеңкелер» театрының қойылымы қазақ халқының ұлттық дәстүрі мен қарапайым тіршілігін және білімге ұмтылған баланың алмайтын асуы, шықпайтын биігі жоқ ізгі де қуатты тұлғаға айналатынын шебер бейнелеуімен көңілден шықты.

Жиынды ашқан «Назарбаев Университеті» ДББҰ президенті Шигео Катсу балалардың өсіп-өркендеуі, орнықты міне­­зі бар, талдау мен саралау қабілеті зор және жеке тұлға ре­тінде коммуникативті, зият­кер­лік дағдыларға ие адам қалып­тастыру үшін білім бе­ру­дегі құндылықтардың қоғам өмі­рінде басымдыққа ие екенін жеткізді. 

– Бұл білім алушылар мен отбасы тарапынан өзіндік бір тәр­тіпке бағдарлануды, барлық мәселені жұмыла қарасты­руды талап етеді. Біз осы құндылықтар әрі қарай дамуы үшін балаларға айрықша серпін бе­руіміз керек. Осыған орай түрлі технологиялық-инновациялық әдістемелер арқылы балаларды шынайы өмірге дайындаймыз. Олардың өркендеуін қамтамасыз ету үшін этикалық, рухани тәрбие жағына да зер салу керек. Осы кешенді тәсіл саламатты өмір салтын игеруге мүмкіндік береді. Оқушылардың сана-сезіміне ғана ықпал етіп қоймай, жүректеріне жол таба білу керек, – деді ол. Ал «Назарбаев зият­керлік мектептері» ДББҰ басқарма төрайымы Күләш Шәм­шидинова дәстүрлі конфе­ренцияның қазақстандық жә­не шетелдік педагогика мамандарының арасында ын­тымақтастық орнатып, үздік тәжі­рибелермен бөлісуге негіз болып отырғанын, әлемнің қарқынды түрде өзге­руі эко­но­микаға, саясатқа, мәде­ниетке, білім беруге қатысты жаңа үрдістерді туындатып отырғанын атап өтті. Жаһандану, технологиялық инновациялар, климаттық, демографиялық және басқа да өзгерістер адамдар мен қоғам тиімді икемделуі тиіс жаңа талаптар қойып, жаңа мүмкіндіктерге жол ашады. Әлемнің өзгеруі – балалардың өзгеруі. Қазіргі балалардың өмірі туа тіршілігіне дендеп енген қуатты технологияларға байланысты бұрынғы әлеуметтік маңызды институттардың бірі болған аулаларды жоғалтудан басталады. Олар әлеуметтік желілерде өздеріне тән талқы­лармен, әзілдерімен, сөйлеуімен өмір сүре бастады, деді бас­қарма төрайымы. Осы ретте К.Шәмшидинова сарапшылар мен педагогтердің айтуынша, бүгінгі балалардың алдыңғы буынға қарағанда көп өзгергенін жеткізді. Яғни қабылдауы жыл­дамырақ, есте сақтауы азырақ, іздеу мен табуды білетін, аздаған ақпараттарды бөлісе алатын, ортаға тез қосылатын, ойын ба­тыл жеткізуге қорықпайтын ұрпақ өсіп келеді. Сондай-ақ олар әлеуметтік желілерде қа­лай жақсы табыс табу туралы да жетік біледі. Осы іспетті өзгерістер заманында мектептер оқушыларды өмірге дайындап үлгере ме деген сауал тууы заңдылық. Бұл қоғамның да, жұмыс берушілердің де көкейінде тұрған мәселе. Осы сияқты күрделі жайттардың шешімін іздеудегі халықаралық зерттеулерді тілге тиек еткен Күләш Ноғатайқызы зияткерлік мектептердің мақсаты өзгеріске тез бейімделуге қабілетті тұлға тәрбиелеу екенін айтты. Қазіргі кезде зияткерлік мектептерде негізгі білім беру бағдарламасы қосымша элективті курстармен және сабақтан тыс тәрбие шараларымен толықтырылған. Арнайы жобаларға негізделген және оқушылардың қызығушылығына сай түрлі үйірмелер мен клубтар, әлеуметтік тәжірибелер мен акциялар балаларға туған жердің тарихы мен мәдениетін, әдет-ғұрпы мен салт-дәстүрін тануға, еліміздің әр саладағы жетістігін білуге шақырады. Бұл орайда «Туған елге – тағзым», «100 күйдің тарихы», «Екі апта ауылда», «Қазақ әндері» сынды жобалар сәтімен жүзеге асырылуда. Таратуға лайық идеялар ретінде «TEDx» алаңы, домбыра курстары, ғаламтордағы қазақ тіліндегі контентті арттыруға бағытталған «Уикипедия» клубы сұранысқа ие. Осы жобалар аясында өлкетану экспедициялары ұйымдастырылып, бес жылда 20-ға жуық маршрут бо­йынша тарихи-танымдық зерттеу жұмыстары жүргізілді. 

АҚШ-тың Аризона штаты университетінен келген сарапшы Паси Салберг өз сөзінде 2007-2008 жылдардан бастап зерттеушілердің АҚШ, Ұлыбритания, Германия сияқты алдыңғы қатарлы елдердің әлемдік рейтингте үздік нәти­желер көрсете алмайтыны жө­нінде мәселе қоя бастағанын айтты. Өйткені әлемдегі көп­теген білім жүйелері мектептер арасындағы жарысты алға жылжудың ең тиімді жолы деп біледі екен. Бұл ретте АҚШ-ты мысалға келтіруге болады. Ал Финляндия, Канада, Жапония сияқты елдерде білімнің озық жүйесі басымдықты мектептер мен мұғалімдер, оқушылар арасындағы әріптестікке сүйейді. Сондай-ақ дамыған елдердің арасындағы қателіктердің бірі – реформаларға құмарлық пен жекешелендіру идеясына тым беріліп кету, деді ол. 

Конференциядағы осы сияқты шетелдік сараптаулардың нәтижесіне қарасаңыз, табыстың кепілі мектептерге деген сенім, балалардың білімге тең жағдайда қол жеткізуі, жұмысқа тек жоғары білікті мамандарды тарту, мұғалім мен оқушы және ата-ана үштағанының биліктің алдында емес, қоғам мен бір-бірінің алдында жа­уапты болуы, білімнің тауарға емес қоғам игілігіне айналуы, мектептердің жақсы достар мен дұрыс тамақтануы жолға қойылған бақытты мекен болуы сияқты көптеген факторлар әсер ететінін байқауға болады.