Қызылордаңыз шөлейтті аймақ қой. Бұйра құмдары бұғып жатыр. Аңызақ желі өкпеңнен өтеді. Селдір өскен сексеуіл демесеңіз, тал-дарақтың да жайқалып тұрғаны шамалы. Жыңғылы мен тораңғылының арасынан анда-санда пыр-пырлап қырғауыл ұшады. Сол шөлейтті аймақпен күн батысқа қарай жүріп келе жатсаңыз үлкен жолдың бойынан Нағи Ілиясов деген ауылға кез боласыз. Ауылға кіргеннен жерұйыққа тап болғандай күй кешеріңіз анық. Айналаны гүл көмкеріп жатыр. Тап бір гүлден кілем тоқығандай. Көк майсасы да жайқалып өсіп тұр. Ағаштарына адам қолының тигені сонадайдан байқалады. Өйткені бойы тіп-тік, беталды өсіп тұрған бұтақ байқалмайды. Ауылдың қақ ортасында қауыздардан су атқылап тұр. Оның қасында Лондондағы Биг-бэннің көшірмесі орын тепкен. Нағилық ағайын сағаттарын осы кіші «Биг-бэнге» қарап түзейді. Мәдениет үйі инеден жаңа шыққандай. Жып-жинақы. Мұнтаздай таза. Ауылдағы ағайынға қызмет ететін орталық дүкені қаладағы супермаркеттерден бір мысқал да кем емес. Дүкенмен жапсарлас мейрамхана орналасқан. «Әсем» мейрамханасына 200 адам бір мезетте сыяды. Нағилық тұрғындар той-томалағын осында өткізеді. Мектебі де жаңа салынғандай. Күрделі жөндеуден өткен. Сонымен қатар тұрғындарға қызмет көрсететін наубайханасы және бар. Қысқасы, келбеті келіскен ауыл. Қала типтес десе де болғандай. Ал ауылға осындай көрік берген кім? Ол – Абзал Ералиев деген абзал азамат. Қызылордадағы күріш өндірумен айналысатын «Абзал және К» серіктестігінің төрағасы. Осы ауылдың төлтумасы. Ауыл бір күнде осындай бола қалған жоқ. Оның көркеюіне арнайы мамандар шақырып, адамдарды жұмылдырды. Айналасы үш жылдың ішінде Нағи ауылы адам танымастай өзгерді. Оған 250 миллион теңге көлемінде қаржы жұмсалды. Сөйтіп Нағи Ілиясов ауылы заман талабына сай жаңғырды. Өткенде Елбасы Сыр өңіріне сапар жасағанда осы ауылға соқты. Ауылды көріп ризашылығын білдірді.
Бұл ауылдың негізі 1931 жылы қаланған. Жалпы жер көлемі 17549 гектарды құрайды. Бүгінде ауылда 2235 адам тұрады. Сондай-ақ, ауылда 5 шаруа қожалығы жұмыс жасап жатыр.
Осындайда ой келеді: қазақ ауылдарынан шыққан кәсіпкер жігіттер көп қой. Солардың бәрі Абзал Ералиевтен үлгі алса. Сөйтіп өз ауылдарын көркейтсе дейсің. Сонда Қазақстанда көріксіз ауыл болмас еді.
Ержан БАЙТІЛЕС.
Қызылорда облысы.