Үндеуден өрістейтін іс көп

Баспана мәселесіне байланысты облыста осыған дейін де жұмыстар қызу жүргізіліп келді. Соңғы үш жылда тұрғын үй құрылысына салынған инвес­тицияның көлемі 10 есе артқан. Бір жылда берілген баспана 36 пайызға артқан, 2,6 мың отбасы қоныс тойын тойлады. Қос­танай қаласының өзінде, қала ір­ге­сінде жаңа тұрғын аудандар бой көтеріп келеді. Алайда 24,5 мың адам баспана кезегінде тұр.

– Елбасы ұсынып отырған «7 – 20 – 25» мемлекеттік бағдарламасы қостанайлықтардың да ипотека­лық несие алу мүмкіндігін барынша кеңейтетін болады. Онда айтылған жеңілдіктер арқылы адамдар баспана жағдайын жақ­сар­татын болады, – деді Архимед Бегежанұлы.

Елбасы бастамалары тек әлеу­меттік саланы дамытуды ғана көз­демейді, бұл ішкі нарықтың, сонымен қатар құрылыс сала­сы­ның дамуына ықпал етеді.  Елбасы бастамасы арқасында құрылыс жұмыстарын болашақта ауылға қарай бұрамыз деп ойлаймын. Ауыл шаруашылы­ғын дамыту үшін маман керек, ал жас мамандарға баспанасыз қиын болатынын көріп отырмыз. «7 – 20 – 25» мемлекеттік бағ­дар­ламасы ауылдағыларға да үй салуға мүмкіндік береді, деді «Ирина и К» құрылыс ком­па­ниясының жетекшісі Александр Корчинский.

Баспана сөз болғанда Елбасы Үндеуіндегі үшінші бастамада айтылған студенттердің жатақ­хана жағдайын жақсарту мәсе­лесі бірден еске түседі. Алды­мен Елбасы 2018-2019 жылдары жоғары білім алу үшін жыл сайын бөлінетін 54 мың грант­қа тағы қосымша 20 мың бөлінетінін айтты. Оның 11 мың гранты техникалық мамандықтар дайындауға арналады. Ал қазір төртінші өнеркәсіптік революция жағдайындағы экономика үшін техникалық мамандар аса қажет. Елбасы бастамасымен бөлінетін қаржыға енді мыңдаған мамандар дайындауға мүмкіндік туады. Ал сол болашақ мамандар сапалы білім алу үшін олар­дың әлеуметтік жағдайын жақсар­ту тағы бар. Қостанайлық студент жастардың жатақханаға зәрулігі бар екені жасырын емес. Қазір облыс өңірінде 3305 студент, оның ішінде жоғары оқу орындарында – 1805, колледж­дерде 1455 студенттің жатақ­хана­да ор­ны жоқ. Оның барлығын шешу үшін өңірдегі резервтер де қарас­тырылатын болады.

– А.Байтұрсынов атындағы Қостанай мемлекеттік универ­ситеті жанындағы жатақхана­­ның жобалау-сметалық құжат­тары дайын тұр. Ол пайдалану­ға берілгенде студенттердің бос уа­қы­тын дұрыс ұйымдастыруға ық­­пал етеді, жастар арасындағы қыл­мыс та азаятын болады. Енді облыстағы басқа жоғары оқу орын­дарымен де мемлекет пен жеке­меншік әріптестігі аясында осындай жұ­мыс­тарды қолға алатын боламыз, – деді өңір басшысы.

Облыстағы Рудный және Арқа­­лық секілді қалаларда да жоға­­ры, орта оқу орындары бар. Олар­да есік-терезесі үңірейіп бос қал­ған, бірақ қабырғасы, ірге­та­сы мықты көпқабатты үйлер әлі тұр. Архимед Бегежанұлы осындай үйлерді қайта жөндесе, ол сту­дент­ке жатақхана, кәсіпкерге жұ­мыс болатынын да еске салды.

Сонымен қатар активте ай­лық жалақыны өсіру үшін салық жүктемелерін азайту, шағын несиелерді кеңейту, елімізді одан әрі газдандыру мәселелері туралы әңгіме болды. Облыста 331 632 жалдамалы жұмысшы­лар бар. Әрине салық жүктемесі азай­ғанда, босаған қаржының есеб­інен олардың жалақысы көбейеді.

Жаппай кәсіпкерлікті дамыту үшін Елбасы Үндеуіндегі төртінші бастама игі істерге мұрындық болады. Өнімді жұ­мыспен қамту және жаппай кәсіпкерлікті дамыту үшін 2018 жылы қалаларда 237 млн теңге, ауылдарда 2 млрд 83 млн теңге бөлінді. 2016 жылдан бері облыс­та «Қос қолдау» кәсіпкерлер­ді өңірлік қаржылай қолдау бағ­дарламасы мен «Атамекен Қос­танай» шағын несие ұйымы ар­қылы 46 несие және 142 шағын несие берілген. Енді Елбасы Үн­деуінде айтқан жеңілдіктерді пай­даланып, Қостанай өңірі­нен де мыңдаған адамдар өз ісін жеңіл аша алатын болады.

Елбасы Нұрсұлтан Назарбаев Үндеуіндегі бесінші бастама – елді одан әрі газдандыру мәсе­лесі қостанайлықтардың да тұрмы­сын көтере түсетін болады. Газ­дан­дыру Қостанай өңірі үшін де инфрақұрылымды дамытудың маңызды бағытының бірі болып саналады. Облыс өңіріндегі 880 мың тұрғынның 54 пайызы көгілдір отынмен қамтылған. Биыл Федоров, Әулиекөл аудан­дарындағы елді мекендерді және Рудный қаласындағы жекелеген шағын тұрғын аудандарды газдандыру үшін 2 млрд теңге қаржы бөлінді. Көгілдір отын жет­кізу үшін облыста мұнан бөлек те жобалар қарастырылып отыр. Ол бойынша алдағы уақыттар­да шалғайда жатқан Қамысты, Денисов, Әулиекөл, Жітіқара аудан­дарын­дағы елді мекендер де газдың рахатын көретін болады.

 Нұрсұлтан Назарбаевтың «Президенттің бес әлеуметтік бастамасы» атты Үндеуі мемлекет саясаты алдымен елдің әлеу­меттік жағдайын көздейтінін көрсетті. Тіпті қиын жылдардың өзінде елімізде зейнетақы, жала­қы, жәрдемақы өсіріп отырды. Жақсы тұрмыс халықтың бір­лігін нығайта түседі. Елбасы сая­сатының көздегені де осы.

Нәзира ЖӘРІМБЕТ,

«Егемен Қазақстан»

ҚОСТАНАЙ