Ш.Айманов атындағы «Қазақфильмге» қарасты «Дебют» шығармашылық-өндірістік бірлестігінде түсірілген «Хат» фильмі мамыр айының 3 мен 8-і аралығында Германияда өткен 64-халықаралық «Оберхаузен» қысқаметражды фильмдер кинофестивалінің (Internationale Kurzfilmtage Oberhausen) негізгі конкурстық бағдарламасына іріктеліп алынды.
Жас режиссер Әділ Мұсатаев түсірген дебюттік картина іштей жан арпалысына түсіп, анасына хат жазуды армандап, толғаныста жүрген балалар үйінің тәрбиеленушісі туралы баяндайды.
– Фильм оқиғасы шынайы өмірден алынған. Бұл оқиға Өскемен қаласындағы балалар үйінде болған екен. Осы оқиғаны танысымнан ести сала, дайын драматургияның бар екенін аңғарып, оны кино тілімен сөйлетуге асықтым. Жас режиссерлерге қанат бітіретін осындай беделді кинофестивальде алғашқы фильмімнің тұсауы кесілгеніне өте қуаныштымын,– дейді режиссер Әділ Мұсатаев.
«Оберхаузен» кинофестивалінің ресми сайтының мәліметі бойынша, биылғы халықаралық фестивальдың негізгі байқауына 33 елден 53 қысқаметражды фильмнің қатысқаны белгілі болды. Олардың арасында АҚШ, Қытай, Мысыр, Аргентина, Бразилия, Үндістан, Франция, Жапония, Ресей, Қазақстан, Финляндия және тағы да басқа елдердің режиссерлері түсірген фильмдер бар. Жалпы биылғы байқауға 6000-ға жуық фильмнен тапсырыс түскен.
Алпыс жылдық тарихы бар «Оберхаузен» халықаралық қысқаметражды фильмдер кинофестивалі әлемдегі қысқаметражды фильмдерге арналған ең ірі байқаулардың бірі. Ол 1954 жылдан бері өткізіліп келеді.
Айгүл АХАНБАЙҚЫЗЫ, «Егемен Қазақстан»
АЛМАТЫ