Нұрәлі Өтеғалиев «Канның жас жұлдыздары» байқауында жеңімпаз атанды

Мектептен тыс жұмыстар орталығында Светлана Гон­чарова мен Ақмарал Ахме­товадан актерлік шеберлік және вокал жанры бойынша сабақ алып жүрген Нұрәлі 6 жасынан бастап үлкен сах­наларға шыға бастапты. Өт­кен жылы Ресейдің Қазан қала­сындағы ән байқауында – 2-орын, Пицунда қаласындағы ән додасында – 1-орын алса, Астанада өткен «Ақ көгершін» байқауының да 1-орын иегері атанған.

– Канндағы бәсеке өте тартысты өтті, – дейді жас ән­ші­нің нағашы әжесі, түр­лі жа­рыстарға апарып, жанында жү­ретін Гүлшат Жан­дәулетова. 

7-9 жас аралығында өнер көрсеткен балғын өнер­паз­дар арасында Нұрәлі Қа­зақстанның намысын жал­ғыз өзі қорғаған. Қазылар алқа­сының төрағасы, француз композиторы Патрик Неббула қазақстандық әншінің өте жақсы дайындықпен кел­генін, сахналық костюмі және ре­пертуары өнерпаздың жасына сай болғанын баса айтыпты. «Нұрәлінің бойында үлкен талант бар. Жалғыз өтінішім – Нұрәлі ән айтуын тастап кетпесе екен» депті Канн консерваториясында ұстаздық ететін Патрик Неббула.

Нұрәлі халықаралық ән байқауының финалында орал­дық қаламгер Мира Шү­йіншә­лиеваның сөзіне жа­зылған сазгер Әділбек Сүлей­меновтің «Қазақстан жас ұланы» атты әнін шырқаған. Нұрәлінің ата-анасы Арыстан мен Мәрия да әскери қыз­меткер болғандықтан шығар, жас әнші де марш стиліндегі рухты шығарманы жан-тә­німен орындаса керек.

Нұрәлі Өтеғалиев енді Санк-Петербург қаласында 2018 жылы 3 қазанда өтетін супер-фи­налға шақырту алып отыр. Франциядағы байқаудан кейін жас әншіні түрлі байқауларға шақырта бастапты. Солардың бірі – алдағы 21-23 маусымда Брест қаласында өтетін ән фес­тивалі. 

– Біз Францияға өз қар­жымызбен барып келдік. Осы байқауға қатысқан өзге өнер­паздардың жанын­да ұстаздары, ата-анасы, тіпті пси­­хологы бар жан­күйер топ жүргенін көріп, қатты қы­­зықтым. Мұндай қам­қорлық, қолдау болса, біздің жас­тарымыз талай биікті бағын­дыратыны анық қой, – дейді Нұрә­лінің нағашы әжесі Гүлшат Жандәулетова.

Қазбек ҚҰТТЫМҰРАТҰЛЫ,

«Егемен Қазақстан»

ОРАЛ