Ерлік – елге мұра, ұрпаққа үлгі. Бабалар ерлігі қазіргі жастарды Отанына деген адалдыққа, ұлтына деген сүйіспеншілікке баулиды. Осы орайда Оңтүстік Қазақстан облысы, Отырар ауданы, Шеңгелді ауылында Ұлы Жеңістің 73 жылдық мерекесіне орай ашылған «Ер есімі – ел есінде» деп аталатын монументтің алар орны ерекше.
Көпшілікке қуаныш сыйлаған монументті ауыл тұрғындары өз қаражатына тұрғызыпты. Қариялар бұл бастаманы туған жерге деген сүйіспеншілік, үлкенге құрмет екенін айтып, ризашылықтарын білдірді. Монументте ел басына күн туған шақта ауылда аянбай еңбек еткен жандардың да есімдері жазылған. Салтанатты жиында игі іске мұрындық болған экономика ғылымдарының докторы Бейбіт Сыздықов көпшілікті ата-бабалардың есімі жазылған монументтің негізгі миссиясын ұмытпауға шақырды. «Шеңгелді ауылының тарихы 300-350 жыл бұрын бастау алған. Бұл уақыт аралығында көптеген ата-бабаларымыз дүниеден озды. Өкінішке қарай, олардың бірін білсек, бірін білмейміз. Сондықтан бұл соңымыздан еріп келе жатқан жас ұрпаққа ата-бабаларымыздың есімдері қашалып жазылған монументті мұра етіп қалдырсақ деген ізгі ниетпен жасалған дүние. Ата-бабаларымыздың аты жазылған жәдігерлерді бүлдірмей сақтап қалу – бүгінгі ұрпақтың негізгі міндеті», деді Б.Сыздықов.
Сондай-ақ шағын елді мекеннің тарихы және қан майданда бейбіт заман үшін жауға қарсы тұрған ауыл азаматтары туралы құнды мағлұматтар қамтылған «Туған жер тарихы» атты кітап та тұрғындарға тарту етілді.
Ғалымжан ЕЛШІБАЙ, «Егемен Қазақстан»