Парламент Сенатында Аграрлық мәселелер, табиғатты пайдалану және ауылдық аумақтарды дамыту комитетінің мүшелері еліміздің Ауыл шаруашылығы министрлігінің және Ақпарат және коммуникациялар министрлігінің басшыларымен бірге Мемлекеттік жер кадастрын және жерді пайдалану мен қорғауды мемлекеттік бақылауды жүргізу мәселелерін талқылады.
Отырысты кіріспе сөзбен ашқан Сенаттың Аграрлық мәселелер, табиғатты пайдалану және ауылдық аумақтарды дамыту комитетінің төрағасы Ж.Нұрғалиев мәселенің еліміз үшін маңызына тоқталып өтті.
Аталған мәселе бойынша Ауыл шаруашылығы вице-министрі Ерлан Нысанбаевтың, Ақпарат және коммуникациялар вице-министрі Дарын Тұяқовтың, Жер ресурстарын басқару комитетінің төрағасы Ермек Кәрентаев және «Азаматтарға арналған үкімет» мемлекеттік корпорациясы» КЕАҚ Басқарма төрағасының орынбасары Ғалым Қарқынбаевтың баяндамалары тыңдалды. Баяндамашылар, министрліктер өкілдері депутаттардың қойған сұрақтарына жауап берді.
Отырыста депутаттар тарапынан жер кадастрын жүргізу мәселесіне қатысты бірқатар сын-ескертпелер айтылып, қорытындысында жер кадастрын жүргізу, оның автоматтандырылған жүйесінің жұмысын ретке келтіру үшін мүдделі мемлекеттік органдар үшін тиісті нұсқаулық құжаттар әзірлеу жөнінде шешім қабылданды.
Сұңғат ӘЛІПБАЙ,
«Егемен Қазақстан»