Қазақстан аумағында ұялы байланыс құрылғыларын тіркеу ережелері бекітілді. Бұл ереже еліміздің «Байланыс туралы» заңы негізінде жасалған. Оған сәйкес ел аумағында жасалған немесе сырттан әкелінген ұялы байланыстың абоненттік құрылғылары түгел тіркелуі қажет.
Байланыс қызметін пайдаланушылар үшін құрылғыны тіркеу қиындық тудырмайды. Ақпарат және коммуникациялар министрлігінің мәліметі бойынша, жеке тұлғалар байланыс құрылғыларын өтініш берілген сәттен бастап 4 сағатта, заңды тұлғалар – 8 сағатта ақысыз негізде тіркей алады. Он төрт пен он сегіз жас аралығындағы кәмелетке толмаған азаматтар байланыс құрылғыларын заңды өкілдерінің келісімімен тіркейді, ал 14 жасқа дейінгі кәмелетке толмағандар үшін заңды өкілдері немесе ата-аналары тарапынан жүзеге асырылады.
Ұялы байланыс құрылғыларын тіркеу және қайта тіркеу үшін құрылғының иесі қызмет көрсетудің автоматтандырылған қызмет көрсету жүйесі арқылы немесе ұялы байланыс операторларының кеңселеріне төмендегі тізімдегі құжаттарды ұсынуы тиіс:
1) ЖСН (жеке тұлғалар үшін) немесе БИН (заңды тұлғалар үшін); 2) абоненттік ұялы байланыс құрылғысының идентификациялық (IMEI) коды; 3) абоненттік ұялы байланыс құрылғысында қолданылатын абоненттік нөмірі.
Ең бастысы тұтынушылар ұялы байланыс құрылғыларын 2018 жылдың соңына дейін тіркеуден өткізіп үлгеруі тиіс. Өйткені ұялы байланыс құрылғылары тіркелмеген жағдайда 2019 жылдың 1 қаңтарынан бастап оларға ұялы байланыс қызметі көрсетілмейді.
Айта кету керек абоненттер ұялы байланыс құрылғыларын тіркеу үшін байланыс операторларының абоненттік бөлімдеріне бармаса да болады. Олар құрылғыларын тіркеуді онлайн режімінде немесе SMS арқылы жүзеге асыра алады.
Серік ӘБДІБЕК, «Егемен Қазақстан»