Ұлттық экономика министрі Тимур Сүлейменовтің халыққа есеп беру кездесуі өтті. Жиында ол Ұлттық экономика министрлігі қызметінің 2017 жылдың негізгі қорытындылары және үстіміздегі жылдың міндеттері туралы баяндады.
«Біздің министрлік әлеуметтік-экономикалық саясаттың үйлестірушісі ретінде халықтың әл-ауқатын және өмір сапасын көтеру үшін ұлттық экономиканың тұтастығы мен тиімділігін қамтамасыз етуде. Өткен жылы Министрлік экономиканың тұрақты өсуін қамтамасыз етуде «2050» Стратегиясын, 5 институттық реформаны және Мемлекет басшысының тапсырмаларын іске асыруды жалғастырды. Еліміздің экономикалық дамуы жаңа жағдайға бейімделу кезеңінен өтті және өсудің орташа әлемдік қарқынын анықтап, 4 пайызды құрады», деді министр.
Экономикадағы құрылымдық өзгерістерге тоқталған Т.Сүлейменов өсудің 2/3 бөлігі шикізаттық емес саламен қамтамасыз етілгенін атады. «Инфляция деңгейінің 2015 жылғы 13,6 пайыздан 7,1 пайызға дейінгі бәсеңдеуіне байланысты қолайлы макроэкономикалық жағдай өсуде негізгі рөл атқарды. Сонымен қатар, стратегиялық құжаттар мен мемлекеттік бағдарламаларды іске асыру оң әсерін тигізді. Мемлекеттік бағдарламаларға жан-жақты тоқталсақ, Индустрияландыру картасы бойынша 2017 жылы 1,5 трлн теңгеге 120 жоба іске қосылды. Тұрақты 10 мың жұмыс орны құрылды. «Нұрлы жол» шеңберінде 4 мың километрден астам автомобиль жолы реконструкцияланды, транзиттік контейнерлік тасымалдаулар 30 пайызға ұлғайды. Былтырғы жылы «Нұрлы жер» бағдарламасы басталды. Жалпы алғанда, рекордтық 11,2 млн шаршы метр тұрғын үй пайдалануға берілді, 100 мыңнан астам отбасы жаңа тұрғын үй алды», деп атап өтті Ұлттық экономика министрі.
Баяндама барысында Тимур Сүлейменов агроөнеркәсіп кешенін дамытудың мемлекеттік бағдарламасы бойынша өткен жылы 851 кооператив құрылғанын және 132 мың тоннаға жуық сүт және 33 мың тонна жеміс-көкөніс өнімдері дайындалғанын тілге тиек етті. «Бизнестің жол картасы шеңберінде 286 млрд теңгеге кредиттер арзандатылып, кепілдендірілді, 23 мың кәсіпкер оқытылды. Барлығы 192 мың немесе 2016 жылмен салыстырғанда 10,3 пайызға көп бизнес субъектісіне қолдау көрсетілді. Нәтижелі жұмыспен қамтуды және жаппай кәсіпкерлікті дамыту бағдарламасының бағыты бойынша 500 мың азаматқа қолдау көрсетілді, олардың ішінде 315 мың адам тұрақты жұмыс орындарына жұмысқа тұрды. 2017 жылы 50 млрд теңгеге 400 өндіруші-экспорттаушыны қолдау шараларымен қамтыған Ұлттық экспорттық стратегия іске асырыла бастады. 2017 жылы халықаралық рейтингтік агенттіктердің Қазақстанның инвестициялық сенімділік деңгейін растауы және болжамның «Терістен» «Тұрақтыға» жақсаруы оң өзгерістердің куәсі болды», деді ведомство басшысы.
Сонымен қатар ол 2018 жылғы зерттеу қорытындылары бойынша Әлемдік бәсекеге қабілеттілік рейтингінде Қазақстан 38-орынға ие болғанын, ал Жаһандық бәсекеге қабілеттілік индексінің рейтингінде 137 елдің ішінде 57-орынға орналасқанын жеткізді.
Ұлттық экономика министрі есеп беру кездесуінің соңында министрліктің алдағы жоспарларына да тоқталып, халықтан келіп түскен сұрақтарға жауап берді.
Рауан ҚАЙДАР, «Егемен Қазақстан»