Биыл қазақ халқының ұлы күйшісі, қазақ күй өнеріндегі айрықша құбылыс болған Ықылас Дүкенұлының туғанына 175 жыл толып отыр. Даңқты қобызшының мерейтойы бүгінде еліміздің бірқатар аймақтарымен бірге, Жамбыл өңірінің аудандарында да аталып өтуде. Әйгілі өнер иесінің мол мұрасы кейінгі ұрпаққа насихатталып, шығармаларының кенен көркемдігі турасында да еңбектер жарық көруде.
Осы орайда Елбасының «Болашаққа бағдар: рухани жаңғыру» бағдарламалық мақаласы аясында Тараз қаласында облыстық зағип және көзі нашар көретін азаматтар кітапханасының ұйымдастыруымен «Классик-композитор Ықылас Дүкенұлы» атты басқосу өтті. Аталған кітапхана директоры Айгүл Оразқұлова рухани жиынды сөз сөйлеп ашып, Ықылас мұраларының маңыздылығына тоқтала келе, қобызшының жеті атасынан бері қарай өнер дарығанын айтты.
Ықылас Дүкенұлы қазақ тарихында қайталанбас қобызшы ретінде қалған тұлға. Сонымен қатар Қорқыт баба жолын жалғастырушы күйшінің «Аққу», «Жезкиік», «Қамбар-Назым», «Қасқыр», «Кертолғау» сынды күйлері халық арасына кең тараған. Басқосуға жиналған көпшілік Ықылас мұрасына ерекше ықылас танытып, қобызшының күйлері жөнінде әңгіме өрбітті. Ықыластың Дүйсебай, Түсіпбай және Ақынбай атты ұлдарының бәрі де қобызшы болғаны туралы дерек те қамтылды. Ал атақты күйшінің қобызы Ақынбайдың ұрпақтарында осы күнге дейін сақталып, бүгінде облыстық тарихи-өлкетану музейінде баға жетпес жәдігерлердің қатарында тұр.
Басқосу барысында облыстық филармонияның әншісі Рауан Әбілқасым Ықылас Дүкенұлының «Ерден» және «Аққу» күйлерін тартса, Жанар Өзтемірова Нұрғиса Тілендиевтің «Әлқисса» күйін нақышына келтіре орындап берді.
Хамит ЕСАМАН, «Егемен Қазақстан»
Жамбыл облысы