Тәуелсіздік күні қарсаңында Астанадағы №64 мектеп-лицейде «Қазақтың Қанипасы» атанған КСРО Мемлекеттік сыйлығының лауреаты, Қазақстан Республикасының еңбек сіңірген мұғалімі, профессор Қанипа Бітібаеваның Шығыс Қазақстан облысы, Өскемен қаласындағы ғылыми-әдістемелік зертханасының филиалы ашылды. Бұл игілікті шараның бастамасы осыдан бір ай бұрын қолға алынған еді. Елорданың Шығыста өткен күндері кезінде зерделі ұстаздар қауымы Қанипа Омарғалиқызы еңбек ететін Жамбыл атындағы облыстық мамандандырылған мектеп-гимназия интернатында болып, жұмысымен танысқан екен. Сол жүздесуде осындай зертхана бөлімшесін Астанада да баянды ету мәселесі қозғалса, енді міне, жүзеге асты.
Дәуірдің дара ұстазының ғылыми-әдістемелік зертханасының мүмкіндігін кеңейту, ұстаздың жаңашыл іс-тәжірибесін тарату мақсатында ашылған филиалдың алғашқы отырысында Астанамыздағы мыңға тарта қазақ тілі мен әдебиеті пәндерінің мұғалімдері өз ойларын ортаға салып, тәжірибе алмасты. Бұдан кейін Қанипа еңселі елорданың бүгінгі көркіне тәнті болғанын, бір кездері бірлі-жарым ғана қазақ тілінде сабақ өткізетін білім ұялары болса, қазір таза мемлекеттік тілде оқытатын білім ордалары 23-ке жеткенін, сол секілді 35 аралас, 11 орыс тілді мектептерде сабақ беріп жүрген мұғалімдердің талпынысына дән ризалығын білдіріп, әдебиет пәнін оқыту жайына тоқталды. Ол сонымен қатар, ескі сүрлеуден шығып, тәуелсіз еліміздің бүгінгі әдебиетін де талдап оқыту жайын қозғап, кешегі алыптардан кейінгі әдебиет өкілдері туралы өзінің арнайы кітап жазғанын, онда Мұқағали Мақатаев, Қадыр Мырзалиев, Тұманбай Молдағалиевтен бастап, арамызда жүрген ақындар Ұлықбек Есдәулет, Есенғали Раушанов, өзге де ақын-жазушылар шығармашылығын талдағанын айтты.
Басқосуды белгілі жазушы Шәрбану Бейсенова түйіндеп, ұстаз ұлағаты туралы тебірене әңгімеледі.
Сүлеймен МӘМЕТ.
Астана.