Бұл жылы еліміздің Ислам Конференциясы Ұйымының Сыртқы істер министрлері Кеңесіне төрағалық етуі көпқырлы дипломатияны жалғастыруға, мұсылман әлемі елдерімен ынтымақтастықты кеңейтуге тың серпін берді. Сонымен қатар аталмыш жыл Президент Жарлығымен Тәуелсіздіктің 20 жылдығы болып жарияланып, мерейтой ұраны «Бейбітшілік пен жасампаздықтың 20 жылы» деп аталды.
18 қаңтар – Астанада Қазақстан халқы Ассамблеясының XII сессиясы өтіп, жиынға «Халық бірлігі – тәуелсіздік негізі» дейтін атау бұйырды.
27 қаңтар – Елбасы Нұрсұлтан Назарбаев «Қазақстан Республикасы Тәуелсіздігінің 20 жылдығын атап өту туралы» Жарлыққа қол қойды.
4 ақпан – Қазақстан Президентінің кезектен тыс сайлауы алдағы 3 сәуірге белгіленді.
8 ақпан – VII Қысқы Азия ойындары салтанатты түрде жабылды. Оған Елбасы Н.Назарбаев қатысты.
12 ақпан – қала басшысы И. Тасмағамбетов VII Қысқы Азия ойындарында жеңіс тұғырына көтерілген елордалық спортшыларды қабылдап, Елбасы атынан пәтер сыйлады.
17 наурыз – Ұлыстың ұлы күні қарсаңында Елбасының қатысуымен Конгресс-холда мерекелік шара өтіп, жиын үстінде 400 отбасына пәтер кілті табысталды.
30 наурыз – Президент Н.Назарбаев Астанада тұрғын үй құрылысын дамыту бағдарламасы бойынша салынып жатқан «Жағалау-3» тұрғын үй кешенін аралап көрді.
3 сәуір – кезектен тыс Президент сайлауы өтіп, «Нұр Отан» ХДП Төрағасы Н.Назарбаев сайлаушылардың 95,5 процент дауысына ие болды.
8 сәуір – Тәуелсіздік сарайында Қазақстан Республикасының Президентін ұлықтау рəсімі өтіп, Орталық сайлау комиссиясының төрағасы Қуандық Тұрғанқұлов Нұрсұлтан Назарбаевқа Қазақстан Президенті куәлігін салтанатты түрде табыс етті.
19 сәуір – Мемлекет басшысы елордада салып жатқан жаңа опера және балет театрының құрылысын аралап көрді.
23 мамыр – қала әкімі И.Тасмағамбетовтің төрағалығымен Астанада ЮНЕСКО және ИСЕСКО істері жөніндегі Ұлттық комиссияның отырысы өтті.
25 мамыр – елордада Дүниежүзі қазақтарының IV құрылтайы басталды. Тәуелсіздік сарайында өткен жиынға Елбасы – Дүниежүзі қазақтары қауымдастығы Төралқа Төрағасы Нұрсұлтан Назарбаев өзі қатысып, сөз сөйледі.
10 маусым – Елбасы Н.Назарбаев қаланы көмкеріп тұрған жасыл белдеу – орман алқабын аралап, оған қырғауыл ұшырылып, елік жіберілген сәтке куә болды.
4 шілде – Елбасы Н.Назарбаев мемлекеттік рәміздер алаңында қала күнінің ресми ашылуына қатысып, әскери оқу орнының түлектеріне офицерлік шен тапсырды.
6 шілде – Прездент Н.Назарбаевтың қатысуымен бас қалада трамвай желісі құрылысының іргетасы қаланып, капсула қойылды.
26 шілде – Елбасы Н.Назарбаев Астанадағы ғылыми-зерттеу жобалау институтына барып, тәуелсіздіктің 20 жылдығына арналған салтанатты қақпаның жобасын көрді.
25 тамыз – Қазақстанға ресми сапармен Корея президенті Ли Мён Бак келді. Оған «Астана қаласының құрметті азаматы» атағы берілді.
9 қараша – Елбасы Н.Назарбаев қала әкімі И. Тасмағамбетовті қабылдады. Қала басшысы елорданың әлеуметтік-экономикалық даму қорытындылары мен алдағы уақытта пайдалануға берілетін нысандар жайлы, сондай-ақ ел тәуелсіздігінің 20 жылдығын мерекелеуге даярлық барысы туралы Елбасын хабардар етті.
24 қараша – елорда басшысы И.Тасмағамбетовтің қатысуымен шаһардың инфрақұрылымын жаңғыртуға бағытталған жиын өтті.
9 желтоқсан – Мемлекет басшысы Н.Назарбаев елордада «Тұлпар-Тальго» жолаушы вагондарын шығаратын зауыттың ашылуына қатысты.
16 желтоқсан – Астанада Қазақстан Тәуелсіздігінің 20 жылдығына орай «Мәңгілік Ел» қақпасының салтанатты ашылуы болды. Ресми шараға Мемлекет басшысы Н.Назарбаев қатысты. Нысанның биіктігі – 20 метр. Қақпаның сол жақ қапталында «Ақсақсал» мүсіні орнатылған. Бұл – халықтың рухани өлшемінің көрінісі, даналық символы.
19 желтоқсан – Брюссель қаласында EFQM бас директоры Пьер Каше Астана қаласына сапа менеджменті жөніндегі Еуропалық қордың «Мойындалған жетістік» сертификатын тапсырды. Бұл құжат – сапа менеджменті жүйесін енгізуде бәсекеге қабілетті үздіктерге берілетін марапат.
Дайындаған Бекен Қайратұлы
«Егемен Қазақстан»