Ұлттық академиялық кітапханада Қазақстан халқы Ассамблеясы мүшелеріне Қазақстан Республикасының мемлекеттік наградаларын және «Қазақстан Республикасының тәуелсіздігіне – 20 жыл» мерейтойлық медальдарын тапсыру салтанаты өтті.
Ассамблея мүшелеріне ел Президенті, Ұлт көшбасшысы және Қазақстан халқы Ассамблеясының Төрағасы Нұрсұлтан Әбішұлы Назарбаевтың атынан наградаларды ҚХА Төрағасының орынбасары – Хатшылық меңгерушісі Ералы Тоғжанов тапсырды.
Қазақстан Республикасының мемлекеттілігін қалыптастыру мен егемендігін нығайтуға қосқан үлкен үлесі, қоғамдағы келісімді сақтау саласындағы жемісті қызметі, еліміздегі бейбітшілік, достық пен ел бірлігін нығайтуға сіңірген еңбегі үшін, сондай-ақ Тәуелсіздіктің 20 жылдығына байланысты Ассамблеяның 49 мүшесі наградталды, олардың ішінде ҚХА Кеңесінің мүшелері, республикалық және аймақтық этномәдени бірлестіктер басшылары, Ассамблеяның Ғылыми-сараптық кеңесінің өкілдері бар.
Е.Тоғжанов Тәуелсіздіктің ең басты құндылық ретіндегі ауыспайтын маңызын көрсете отырып, қонақтарды Тәуелсіздіктің 20 жылдық мерейтойымен құттықтады. Тәуелсіздіктің арқасында, қоғамның сан қырлылығы мен полиэтностылығын, халықтың дамудың үздік тәжірибесіне бейімділігі мен еркіндік сүйгіш мінезін негізге ала отырып, ұлттық саясатты жаңа мемлекет құруға бағыттауға жол ашылды, оның басты жетістіктері – бейбітшілік, прогресс және этносаралық толеранттылыққа қол жеткізуге мүмкіндік пайда болғанын атап өтті.
Е.Тоғжанов: «Ел бірлігі мен қоғамдық келісім еліміздің жемісті дамуын қамтамасыз етті. Қазақстан Тәуелсіздіктің 20 жылында «қазақстандық жол» ұғымымен бейнеленетін тұрақтылық пен әлеуметтік-экономикалық прогрестің өзіндік формуласын жасап шықты», – деді.
Шарада Тәуелсіздіктің 20 жылдығы мерекесіне арналған мерейтойлық іс-шараларды өткізу бойынша Қазақстан халқы Ассамблеясы жұмысының қорытындылары шығарылды. Осы жұмыс аясында Ассамблея ҚХА-ның Тәуелсіздіктің 20 жылдығын өткізу жөніндегі арнайы іс-шаралар жоспарына сәйкес 475 шараны іске асырды.
Республика бойынша аймақтық Қазақстан халқы Ассамблеяларымен тақырыптық іс-шаралар, қазақстандық құндылықтар – бейбітшілік, этносаралық келісім, отансүйгіштік, ел бірлігін одан әрі нығайтуға бағытталған конференциялар мен «дөңгелек үстелдер», этномәдени бірлестіктер мен Достық үйлерінің ашық есік күндері, конкурстар, шығармашылық кездесулер, қайырымдылық акциялары, көрмелер, концерттер, өнер және қолданбалы туындылар фестивальдары, спорттық жарыстар және т.б. өткізілді.
«Егемен-ақпарат».
Астана.