Елбасы «Евразия жүрегінде» кітабында «Астананың дамуы – Қазақстанның дамуы» деген қарапайым да ұғынықты формуланы ұсынып, бүгінгі күні бұл бағытта үйлесімді түрде атқарылған жұмыстардың нәтижесі бойынша өзара тығыз ықпалдастыққа негізделген кешенді шаралардың жүзеге асырылғанын байқау қиын емес. Астананың тікелей ықпалының нәтижесінде басқа облыс орталықтарында, бір жағынан, Астананың қажетін қанағаттандыруға арналған салалар пайда болып, дами бастаса, екінші жағынан, бұдан қаланың өз қажеттіліктеріне де қозғау салғаны көпшілікке аян. Президентіміздің «Елорда мемлекеттің тұтастай алғандағы даму қарқыны мен сипатын айқындайды.
Мысалы, Астанада қабылданған елдің индустриалдық-инновациялық даму бағдарламасы сұраныс пен ұсыныс нарығын қала аумағында ғана емес, бүкіл республика бойынша қалыптастыруға жол ашты» деуі айқын ақиқатқа айналып, үздіксіз прогресс пен тұрақты өркендеу жолының бастауы болғанын солтүстікқазақстандықтар да әркез мақтаныш етеді. Бас қалаға қарап ой да, бой да түзеп келе жатқан теріскейліктер осыдан бірер жыл бұрын Бөгенбай және Жеңіс көшелері қиылысында саябақ тұрғызып, тарту етсе, биыл жалпы ұзындығы 56 шақырымды құрайтын велотрассаның салынуына өз үлестерін қосты. Оны пайдалануға беруге 30 шақты техника, 50-ден астам адам жұмылдырылып, жол жиектеріне 160 аспалы шам, 25 қоқыс жәшігі орнатылды, деді сөйлескенімізде «Жолқұрылыс-НС» ЖШС-нің учаске жетекшісі Досбол Жолмағанбетов.
«Астананың гүлденуі – Қазақстанның гүлденуі» мемлекеттік бағдарламасы аясында тоғыз жолдың торабында орналасқан Петропавл қаласы да өсіп-өркендеп келеді. Жуырда Нұрсұлтан Әбішұлының тікелей тапсырмасына орай Солтүстік Қазақстан облысының 2018-2021 жылдарға арналған кешенді даму жоспары түзіліп, 64 іс-шараны іске қосу белгіленді. Ол бойынша 12 бағытты қамтитын жобалар шеңберінде әлеуметтік нысандар, көлік және инженерлік коммуникациялар, агроөнеркәсіп, қорғаныс обьектілері жаңғыртылады. 300 миллииард теңгенің инвестициялық қаржысы құйылып, 14 мың жаңа жұмыс орны құрылады. Жұмыс тобының отырысында аймақ басшысы Құмар Ақсақалов Елбасы тапсырмасын орындаудың маңыздылығын, кешенді жұмыстар өңірдің әлеуметтік-экономикалық дамуына зор серпін беретінін, тұрғындардың өмір сүру сапасын нығайтатынын атап көрсетті. Тек биылдың өзінде ғана жылу, жарық, су жүйелерін қалпына келтіруге республикалық қазынадан 5,1 миллиард теңге бағытталып отыр. «Бес әлеуметтік бастама» жобасы бойынша 2018-2019 жылдары облыс орталығында 1,5 мың пәтер тұрғызылады. Бір сөзбен айтқанда, «Астана елдің барлық өңіріне өң беретін және мемлекет жүрегінің жұмыс қабылетіне жаңғырық болып жететін барша қоғамдық қатынастың жиынтығы» екенін солтүстікқазақстандықтар да жақсы сезінеді.
Мерейтой қарсаңында «Астана – бейбітшілік пен келісімнің бастауы» атты шараны Қазақстан халқы облыстық ассамблеясы ұйымдастырып, қазіргі заманға лайық астана салу идеясы, бүгінгі күні әлемдік зор мәртебеге ие елорданың қалыптасу төңірегінде тағылымды әңгімелер қозғалды. «Қазақ тілі» халықаралық қоғамы жергілікті ұйымының төрағасы Жанкелді Тәжиннің айтуынша, Астана Қазақстанның, қазақ халқының брендіне айналып, жер жүзі Тәуелсіздіктің , халықтар достығының символы ретінде таниды. «Абылайхан резиденциясы» музей кешенінде «Киелі Түркістан» көрмесі ашылып, жұртшылық назарына небір құнды жәдігерлер ұсынылды. «Әзірет Сұлтан» мемлекеттік тарихи-мәдени қорық мұражайы жылына 60-тан астам іс-шара өткізіп, астана ажарын айшықтауға да зор үлес қосып келеді.
«Асыл мирас «қайырымдылық қорының қолдауымен жақында балалар ауруханасына 76,6 миллион теңгенің стационарлық сандық рентгенографиялық кешені, әмбебап ультрадыбыстық және екі дезинфекциялық камера тарту етілді. Салтанатты рәсімде сөйлеген сөзінде қордың директоры Марат Айтмағамбетов мемлекет-жекеменшік әріптестігі шеңберінде қолға алынған жобалар елорда мерейтойына арналғанын, елімізде алты сауықтыру орталығы ашылғанын, 366 бала емдеу курстарынан өткенін, соңғы бес жылда жарты миллиард теңгенің қайырымдылық шаралары көрсетілгенін жеткізді. Өңірде медициналық кластер құру, 700 орындық көпсалалы аурухана тұрғызу міндеті тұр.
Осылайша Астананың 20 жылдығы Қызылжар өңірінде де кең көлемде атап өтіліп, тұрғындардың ерекше қызығушылығын тудырды.
Өмір ЕСҚАЛИ, «Егемен Қазақстан»
Солтүстік Қазақстан облысы