«Тәуелсіздіктің 20 шыңы» жұлдызды күндерінің шырайлы шарапатына бөленген көп балалы аналар Мәдениет сарайында тәлімді басқосу өткізді. Қазір Көкшетау қаласында 83 «Батыр ана», 409 «Алтын алқа» иегері тіршілік тамызығын маздатуда. Ал бес баланы тәрбиелегендерді қосқанда олардың саны 500-ге жақындайды екен.
«Бір қолымен бесікті, бір қолымен әлемді тербеткен» аналарды Көкшетау қаласы әкімінің орынбасары Тасболат Кәкпенов құттықтап, мерекелік сый-сияпат тапсырды. Асыл жандар құрметіне ән шырқалып, домбыра күмбірледі. Балабақша балғындарынан бастап, аты әйгілі қайраткерлер, өнер майталмандарының жүрекжарды лебіздері зәулім залды алғыс сезімімен тербетіп тұрғандай еді.
Аналар мен әжелер бұл жолы «Келіндер сайысы» байқауын тамашалады. Облыс орталығындағы ақтық сынға 9 келін шақырылған екен. Олар отбасылық құндылықтар, ұлттық салт-дәстүрлеріміз, күнделікті қарым-қатынас қағидаттарынан өнеге төккен арулар жұртшылықты қол өнерімен де, ән өнерімен де тәнті етті. Қазылар алқасындағы қайын енелер бірінші орынға Атбасар қаласынан келген Әсем Әбдірахманова, ал жүлделі орындарға көкшетаулық Бибіажар Исабекова мен бурабайлық Бақытжамал Рамазанованы лайықты деп тапты.
Байқауға қатысушылар Қазақстан Республикасы Президенті жанындағы Әйелдер істері және отбасылық-демографиялық саясат жөніндегі ұлттық комиссияның алғыс хаттарымен марапатталды.
Бақберген АМАЛБЕК,
Ақмола облысы.