Нарық заңы қатал. Өйткені, қай салада болмасын дайын өнім тұтынушы сұранысын қанағаттандырумен қатар, бәсекеге қабілетті болуы шарт. Осы талаптан көрініп, еліміздің энергетика рыногында өз орнын тапқан Есік қаласындағы «Электрокабель» зауыты 10 жылдан бері осы алғышарттарды басшылыққа алуға ұмтылып келеді. Сондықтан да өнімдері үлкен сұранысқа ие. Өйткені, ескірген желілерді ауыстыру мен жаңасын салу қарқын алған. Кәсіпорынның электр-техникалық өнім түрлерін шығаратын сенімді серіктестікке айналуы осыдан.
Отандық өнім өндіруші ретінде алғашқылардың бірі болып жұмысын бастаған зауыт француз технологиясымен кабельдер мен түрлі диаметрлі сымдар шығарады. Алюминий созбасымен сырты қапталған кабельдермен қатар, жер асты сымдары және тағы басқа электр құралдары осында дайындалады. Зауыттың қуаты бір айда 100 мың метр кабель шығаруға арналған.
– Біз, ең алдымен, сапаны басты назарға аламыз. Осында шығарылатын кабельдер импорттан еш айырмасы жоқ. Тұтыну мерзімі 50 жылдан аса уақытқа жетеді. Сондай-ақ, бұл өнімдерді қайта өңдеуге болмайды. Яғни, электр сымдарын ұрлап, жеңіл табыс табатындардың жолы болмайды деген сөз, – дейді цех бастығы Зульфикар Чикаев.
Зауыт қондырғылары Түркиядан әкелінген. Мұнда жұмыс істеу үшін де арнайы дайындықтан өтіп, машиналардың тілін білу маңызды. Кәсіпорын басшылары мен бірқатар мамандар Түркияға барып, арнайы дайындықтан өтіп келді. Осында жұмыс істеуге ниетті жастарды қазір өздері үйретуде.
Шикізаттың басым бөлігі Ресей мен Малайзия елінен тасымалданады. Келешекте шетелден емес, алюминий өндіруді қолға алған Павлодар облысынан әкелу жоспарланған. Бұл алдымен шығынды азайтса, екіншіден, уақытты үнемдейді. Елімізде маңызды стратегиялық жобалар жүзеге асып жатқан шақта отандық өнім өндірушілерге деген сұраныс та арта түсуде. Осы бағытта кәсіпорын ұжымы өндірісті кеңейтіп, өнім көлемін ұлғайтуды мақсат еткен.
Қазір зауыт жанынан қосымша ғимарат салынуда. Қондырғыларға тапсырыс берілген. Енді бір-екі айдан соң бұл жерде де жұмыс қызатын болады. Тағы да жаңа жұмыс орны пайда болады. Демек, өнім көлемі де ұлғаяды. Мәселен, алдағы уақытта 300 метр кабель өндіру жоспарланған.
Өңір энергетикасының дамуына үлес қосқаны үшін зауыт ұжымы түрлі дипломдар мен сертификаттарға ие. Халықаралық деңгейде өткен көрмелердің жеңімпазы атанып, жұмыс сапасын жақсартуы осыдан болар.
Күмісжан БАЙЖАН,
Алматы облысы,
Еңбекшіқазақ ауданы.