Балалардың жазғы демалысын тиімді ұйымдастыруда лагерьдің орны бөлек. Биыл атыраулық балалар қаладағы «Бесікті», Махамбет ауданындағы «Арай», Индер ауданындағы «Жас өркен» және Ресейдің Железноводск қаласындағы «Қазақстан геологы» пансионатында демалып жатыр.
«Өткен жылы 100 мыңнан астам оқушы жазғы демалыста лагерьмен қамтылды. Италияда 40 бала, Көкшетау мен Қапшағайда, Алматыда 48 649 бала демалды. Биыл да облыс әкімдігінің қолдауымен осы жұмыстар жалғасын тапты», дейді облыстық білім беру басқармасының бөлім басшысы Алмагүл Қайырлиева. Осы мақсатқа жергілікті бюджеттен 597 млн теңге бөлінген, оның жартысынан астамы «Арай» лагерін күрделі жөндеуге жұмсалды. Енді «Тұлпар» лагеріне жөндеу жұмыстары басталады. Қала сыртындағы демалыс орындарынан бөлек облыстағы 149 білім беру ұйымында мектеп лагерьлері ашылды. «Теңізшевройл» компаниясының демеушілігімен жоғары сыныпта оқитын дарынды балаларға арналған Новосібір жазғы физика-математика мектебінің жұмысы ұйымдастырылып отыр. Лагерьге бармаған балалар үшін де демалысты көңілді өткізуге мүмкіндік бар. Мысалы, «Нұр белес» қоғамдық бірлестігі «Жеті қазына» аула клубын қолға алды. «Жеті қазына», «Бейбарыс», «Хиуаз», «Достық» аула клубтары облыс орталығындағы төрт шағын ауданда жұмыс істейді. Облыстық жастар саясаты мәселелері басқармасының басшысы Роллан Құспанның айтуынша, аула клубтары – балалар мен жасөспірімдердің бас қосатын, шығармашылық идеяларын жүзеге асыратын және бос уақыттарын тиімді өткізетін орын, клубтар ашылғалы бері қызығушылық танытып, үйірмелерге жазылып жатқан балалардың да қатары көп. Дүйсенбі-сенбі аралығында таңертеңгі сағат 9.00-ден кешкі 20.00-ге дейін жұмыс істейтін аула клубтарында 7-29 жас аралығындағы балалар мен жастар ағылшын тілі, домбыра, өлкетану, жас эколог, қолөнер, үстел теннисі, шахмат, дойбы, драма үйірмелеріне тегін қатыса алады.
Бақытгүл БАБАШ, «Егемен Қазақстан»