Мен кезінде Жоғарғы Кеңестің 12-ші шақырылымының депутаты болғанымда, Тәуелсіздік декларациясына дауыс беріп, оның қабылдануына белсене қатысқан адамның бірімін. Сол кезде біз Қазақстанның көкбайрағына, әнұранына, елтаңбасына, Президент Нұрсұлтан Назарбаевқа дауыс берген едік. Енді, міне, содан бері тәуелсіз еліміз үлкен жетістікке жетіп отыр. Елімізде 20 жылда бейбітшілік пен келісім орнап, қазір бүкіл әлем соған қызыға қарайтын жағдайға жетті. Ал Жаңаөзендегі оқиғадағы қылмыстың бәрібір ашылатынына сенемін, оған күмәнім жоқ. Қазір бізге осындай оқиғалардан сабақ алып, бірлігімізді нығайтуымыз керек деп ойлаймын. Мен өзім акушер-гинеколог дәрігер ретінде сәбилердің дүниеге келгенде қандай тәтті болатынын жақсы білемін. Бала өмір үшін, өмірдің қызығын көру үшін келеді. Биыл Тәуелсіздіктің 20 жылдығы. Осы уақыт ішінде тәуелсіздікпен құрдас балалар өсіп, жетілді. Қазір олар оң-солын танитын жігіт жасына келді. Бұл балалар ХХІ ғасырда елімізді өркендетіп, дамытатын азаматтар. Сондықтан бізге өскелең ұрпақтың тәрбиесіне көп мән берген жөн. Әр отбасы – кішігірім мемлекет. Тәрбиенің бәрі отбасынан басталады. Біз балаларға «бұл сенің Отаның, бұл сенің жерің, бұл сенің үйің» деген әңгімелерді жиі айтып, бойларына отансүйгіштік сезім қалыптастырып, тәрбиелеп өсіруіміз керек. Сосын елде рухани құндылықтарды дәріптеп, үлкен идеологиялық жұмыстар жүргізілсе жақсы болар еді.
Қазір біздің елде саяси тұрақтылық, халықтар арасында бірлік пен достық бар. Жаңаөзендегі жағдай біздің елдегі осы саяси тұрақтылықтың, бірліктің болғанын көре алмағандардың әрекеті ме деп те ойлаймын.
Нина КАЮПОВА, «Қазақстан әйелдері одағы» қоғамдық бірлестігінің төрайымы.