«Қара алтын» нарығындағы Қазақстанның басты операторы «ҚазМұнайГаз» ұлттық компаниясы биылғы алғашқы алты айдағы қаржылық және операциялық нәтижелерді жариялады.
KASE ұсынған деректер бойынша компанияның қаржылай кірісі 10 279 миллион долларды құрап, өткен жылдың бірінші жартыжылдығындағы көрсеткіштен 62 процентке асып түскен. Алты ай ішіндегі таза табыс көлемі де былтырғы көрсеткішпен салыстырғанда 32 процентке жоғарылап, 1 102 миллион долларды құрап отыр.
Компанияның осы кезеңдегі күрделі шығындары 542 миллион доллар болды. Бұл да өткен жылғы көрсеткіштен 33 процентке төмен көрсеткіш.
Кәсіпорын осы уақыт ішінде өндірілген мұнай мен газ конденсатының көлемін 11 769 мың тоннаға жеткізіп (тәулігіне 494 баррель), былтырғы көрсеткішті 1 процентке асыра орындады. Алты айдағы табиғи және ілеспе газ өндірісінің ауқымы – 4 123 миллион текше метрге тең.
Арнұр АСҚАР,
«Егемен Қазақстан»