Гонконгта өткен спорттық биден Азия чемпионатында Кирилл Новиков пен Ярослава Кузнецова жұптасып өнер көрсетіп, жеңімпаз атанды.
– Сары құрлық біріншілігіне 1,5 айдай тыңғылықты дайындалдық. Шыны керек, дүбірлі додаға барамыз деп ойлаған жоқпыз. Бірінші орынға көтерілгенімізге өте қуаныштымын. Бізде Ярослава 10 жылдай, ал Кирилл 7 жыл жаттығады», – дейді «Савансер» хореографиялық мектебінің жаттықтырушысы Юлия Ширина.
Бишілердің сөзіне қарағанда 24 елдің арасынан қара үзіп шыға оңайға соқпаған көрінеді. Дегенмен, тамаша өнер көрсеткен олар еуропалық бағдарлама бойынша 5 би билеп, ең күшті саналатын қытайлық, жапондық, гонгконгтық қарсыластарын шаң қаптырған. Кирилл Новиковтың айтуынша, чемпионат жоғары деңгейде ұйымдастырылған. Жеңістеріне біразға дейін сене алмаған. Жарыс яқталған соң келесі күні тайфун басталыпты. 18-35 жас аралығында әлемнің әр қиырынан жиналған мың бұралған бишілермен бәсекелесіп, 2 сингл бойынша алтын жүлдені қоржынға салған.
Ендігі мақсат– қараша айында Австрияда өтетін әлем чемпионатында олжалы болу.
Өмір ЕСҚАЛИ
«Егемен Қазақстан»
Солтүстік Қазақстан облысы