Мен қарапайым еңбек адамымын, әйелім балабақшада тәрбиеші. Үш ұл, бір қызымыз бар. Көп жылдар несие төлеп, әйтеуір екі бөлмелі пәтерімізді өз атымызға рәсімдеп алдық. Он бес жылдан бері Астана тұрғыны болып келеміз. Менің де, әйелімнің де еңбекақысы төмен. Сондықтан жұмыстан тыс уақытта қосымша таксиші болып жұмыс істеуге тура келеді.
Менің бар арманым – балаларымды қатарынан қалдырмай өсіру. Әсіресе спортқа баулуға тырысамын. Төменгі сыныптарда оқығанда көп балалы отбасының мүшесі ретінде спортпен, бимен тегін айналысуға мүмкіндігі болған. Бірақ үлкен сыныптарға барған соң алыстағы спорт кешендеріне баруға және оған ақы төлеуге тура келді. Оның ақысын төлеуді біздің қалтамыз көтере бермейді. Сондықтан екі үлкен баламның спорттан қол үзіп бара жатқанына өкініп жүретін едім. Енді Елбасы Нұрсұлтан Назарбаев Жолдауында Үкіметке жаңадан 100 дене шынықтыру-сауықтыру кешенін салуға тапсырма беруі, мені қатты қуантып отыр. Әрине ондай кешендер Астанада да салынатын шығар деген үміттемін. Мұны естіп балаларым да мәз болып қалды.
Сонымен қатар Жолдауда мектепке дейінгі білім беру сапасын жақсарту және педагогтың мәртебесі туралы арнайы заң қабылдау туралы тапсырма берілді. Бұл он жеті жылдай тәрбиешілік тәжірибесі бар менің әйеліме және оның әріптестеріне қуанышты хабар болды.
Арыстан ЕЛЕМЕСОВ,
Астана электр-техника зауытының жұмысшысы