Жақында өзіміз тұратын Денисов стансасына «Саламатты Қазақстан» атты денсаулық пойызы келді. Кент, жақын маңдағы ауылдар тұрғындары жапа-тармағай барып көрінді. Пойыз дегені болмаса, кәдімгі көшпелі емхана секілді. Ішінде ат сабылтып аудан, облыс орталығындағы ауруханаларға іздеп барып көрінетін медициналық жаңа үлгідегі жабдықтардың барлығы бар. Дәрігерлер мен медбикелер жылы қарсы алып, құрақ ұшып, медициналық тексерулердің барлығынан өткізеді. Менің біраздан бері денсаулығым сыр беріп, мазам болмай жүрген. Ауылда тұрған соң, күнделікті шаруамен кейде дер уақытында дәрігерге жүгіруге мүмкіндік бола бермейтіні жасырын емес.
Кезегім келген соң мен де дәрігердің алдына кірдім. Кардиолог дәрігер қараған соң, маған: «Сіздің науқасыңыз жедел емдеуді талап етеді. Қазір ауруханаға жеткіземіз. Онда баратыныңызды отбасыңызға хабарлап айтып қойыңыз, қорықпасын, емделіп шығасыз», деді. Сәл кешіккенімде, жүрек талмасынан құлайтындай жағдайда екенмін. «Жедел жәрдем» қызметін шақырды да, дәрігерлер мені тез арада аудандық ауруханаға жеткізді. Сол жерде жүрегіме ем алып, отбасыма тәуір болып оралдым.
Ажалдан аман қалған адамның көңіл-күйін әркім түсінер деп білемін. Осы пойызда қызмет көрсеткен облыстық темір жол ауруханасының дәрігерлеріне алғысымды айттым. Бұрын осындай үздік медициналық қызмет бүгінгідей ауылды аралап жүріп пе еді?! Бұл да тәуелсіз еліміздің алға басқан сәтті қадамының бірі деп ойлаймын. «Саламатты Қазақстан» денсаулық пойызын ұйымдастыруды тапсырған Елбасы Нұрсұлтан Назарбаевқа алғысым шексіз.
Денисов ауданы облыс орталығынан шалғайлау жатса да, жағдайымыз жаман емес. Ауданымыздың бірқатар елді мекендері біраз жылдардан бері көгілдір отынды пайдаланады. Ауылда отырып оқ жақпайды. Енді өткен жылдан бері көгілдір отын аудан орталығына және басқа ауылдарға да жеткізіліп жатыр. Ауылдағылардың жағдайы бірте-бірте көтеріліп келеді, тамағымыз тоқ, көйлегіміз көк. Ауыл-үй, көршілердің арасында қандай ұлттың өкілі жоқ дерсіз. Барлығы да бір атаның балаларындай тату-тәтті өмір сүруде. Кең қолтық қазақ жұрты қандай қонақжай десеңші, адамгершілік қасиетті Жаратқан осы халықтың қанына берген. Ауылда бір-бірімізге қарап, алға ұмтыламыз, бірі-бірімізді сыйлап араласамыз.
Осындай жерде туып, осындай елде өмір сүріп жатқанымызға ризамыз. Тілегіміз елдің үстінде.
Л.ЧЕРНЯВСКАЯ.
Қостанай облысы, Денисов ауданы.