2 наурыз күні Астанада «Астана арланс» пен «Мехико сити гуэрерос» командаларының арасында Бүкіләлемдік бокс сериясы жарысының алғашқы ширек финалдық кездесуі өтті.
Бұл айқаста «арландар» қарсыластарын жеңіп, жартылай финалға шығуға бір қадам жақындай түсті. Осы күні «арландар» сапында Мерей Ақшалов (61 кг.) пен Рамжон Ахмедов (85 кг.) жекпе-жектерін сауатты өткізіп, жеңіске жетсе, аса ауыр салмақтағы Руслан Мырсатаевқа қарсыласы Гарсия Омардың кездесуге келмеуіне байланысты жеңіс берілді. Ал Хабибула Исмаил-Ахунов (54 кг.) пен Рүстем Сыбаев (73 кг.), өкінішке қарай, Эмигдио Элиас пен «Мехиконың» украиналық легионері Дмитрий Митрофановтан айласын асыра алмады.
2 наурыз күні Астанада «Астана арланс» пен «Мехико сити гуэрерос» командаларының арасында Бүкіләлемдік бокс сериясы жарысының алғашқы ширек финалдық кездесуі өтті.
Бұл айқаста «арландар» қарсыластарын жеңіп, жартылай финалға шығуға бір қадам жақындай түсті. Осы күні «арландар» сапында Мерей Ақшалов (61 кг.) пен Рамжон Ахмедов (85 кг.) жекпе-жектерін сауатты өткізіп, жеңіске жетсе, аса ауыр салмақтағы Руслан Мырсатаевқа қарсыласы Гарсия Омардың кездесуге келмеуіне байланысты жеңіс берілді. Ал Хабибула Исмаил-Ахунов (54 кг.) пен Рүстем Сыбаев (73 кг.), өкінішке қарай, Эмигдио Элиас пен «Мехиконың» украиналық легионері Дмитрий Митрофановтан айласын асыра алмады.
Енді қарымта кездесу 9 наурыз күні Мехико қаласында өтеді. Осы жерде жартылай финалға қай команданың шығатыны белгілі болады. Әзірше, тіл көзіміз тасқа, «арландардың» мексикалықтарға қарағанда, келесі айналымға шығуға мүмкіндігі көптеу. «Арландарға» жартылай финалға шығу үшін «Мехикодан» 4:1 есебімен жеңілмеу керек. Ал егер 3:2 есебімен жеңіліп жатса, онда командалар арасында жартылай финалға жолдама тағы да сарапқа салынады. Сондықтан «арландарға» келесі айналымға шығу үшін 5 жекпе-жектің үшеуін жеңсе жеткілікті. Солай болатынына сенгіміз келеді.
Дегенмен, «Мехико қаласының жауынгерлері» де оңай шағылатын жаңғақ емес екен. 2010 жылдың қараша айында басталған Бүкіләлемдік бокс сериясы жарысына биыл алғаш рет қатысып жатқан бұл команда өзін бес айдан бері жақсы жағынан көрсете білді. Бұған біздің «Астана арландарымен» болған кешегі жекпе-жектерде тағы көзіміз жетті. Осы кездесуде мексикалық 54 кг. салмақтағы Эмигдио Элиас бесінші өткізген айқасында бесінші жеңісіне жетті. Ол біздің Хабибула Исмаил-Ахуновты айқын басымдықпен ұтты. Сол сияқты «Мехиколық жауынгерлер» сапындағы украиналық Дмитрий Митрофановты да жақсы қырынан айтуға болады. Бұл боксшы да әуесқой бокстан енді келіп, бес раундқа үйреніп жүрген Рүстем Сыбаевтан айласын асырып кетті. Осы жекпе-жекте қазақстандық соңғы раундқа дейін намысты қолдан бермеуге тырысты. Бірақ шебердің аты – шебер, мексикалық жеңіске жетті.
Ал «арландардың» өзбек легионері Рамжон Ахмедовті сол күнгі кештің батыры десе болады. Ол биылғы маусымда үш кездесу өткізіп, соның бәрін де жеңген болатын. Ал мына айқаста намысқа тырысқан Ахмедов Мексиканың швециялық легионері Катенде Кеннедиді айқын басымдықпен ұтты. Ахмедовпен кездесуге дейін 4 рет жеңіп, бір рет жеңілген швециялық легионер біздің боксшыдан мұндай қарсылық күтпеді десе болады. Қысқасы, сол күні кештегі ең әдемі, ең жақсы боксты көрсеткен де осы Ахмедов болды. Оның бес раунд бойы жасаған соққылары Кеннедиді есінен тандыра жаздады.
61 кило салмақта күш сынасқан Мерей Ақшалов болса, мексикалық қарсыласы Гутиерес Ангелді өзіне тән қимыл-қозғалысымен, тактикасымен жеңді. Сөйтіп, ол биылғы маусымдағы 4 кездесуінің бәрін жеңіспен аяқтады.
Ал 9 наурыз күнгі кездесу «Астана арландары» үшін өте жауапты сын болатыны сөзсіз. Өйткені, «Мехико қаласының жауынгерлері» – осал команда емес. Егер «арландар» өз тобында үшінші орын алып, ширек финалға шықса, бұл ұжым «В» тобында екінші орынды иеленіп, келесі айналымға жолдама алған. Олар топтық турнирде 10 кездесу өткізіп, соның алтауында жеңіске жеткен. Барлық жинаған ұпайы – 20. Осы айқастарда олар «Баку оттарын» ғана алға жіберіп қойды. Бірақ, өз тобында Францияның «Париж юнайтед», Германияның «Лейпциг қабыландары», Қытайдың «Бейжің айдаһарлары», Түркияның «Ыстамбұл бұқалары» командаларының бәрін артта қалдырды.
Мексикалық ұжымның сапында талантты, тәжірибелі боксшылар аз емес. Олардың арасында Эмигдио Элиас пен Хуан Ромеро бар. Командада әлі қыры мен сыры ашылмаған легионерлер де көп. Мәселен, болгариялық ауыр салмақтағы Младен Маневті, швециялық Кеннеди Катане мен украиналық Дмитрий Митрофановты солардың қатарына жатқызуға болады.
Егер «арландар» қарымта матчта жеңілмесе, онда жартылай финалда Мәскеудің «Динамо» командасымен кездеседі. Бұл команда өткен жұма күні алғашқы ширек финалдық кездесуінде сырт алаңда Германияның «Лейпциг қабыландары» клубын 5:0 есебімен ұтты. Тағы бір кездесуде «Мумбай жойғыштары» өз алаңында «Баку оттарын» 3:2 есебімен жеңсе, «Париж юнайтед» пен «Милан найзағайы» ұжымдары арасындағы матч сәл кейінірек өтіп, кеше кешкісін аяқталды.
Дастан КЕНЖАЛИН, Суреттерді түсірген Орынбай БАЛМҰРАТ.