Көктал-1 ауданында тұратын бес баланың өліміне байланысты Ішкі істер министрінің орынбасары Юрий Ильин Орталық коммуникациялар қызметінде жедел брифинг өткізді.
«Ең алдымен Астанада түнде болған өрт салдарынан 5 адам қайтыс болған қайғылы оқиғаға байланысты көңіл айтамын. Олардың барлығы – қыздар. Ең үлкені – 13 жаста, ең кішісі – 3 айлық» деді Юрий Ильин.
Ол осы қайғылы оқиғаның болу себебіне қысқаша тоқталды. Көктал-1 мөлтек ауданы, Шыңғыстау көшесіндегі 5-үйде түнгі сағат 2-ден 34 минут кеткенде Өрт қауіпсіздігі қызметіне көрші үйден хабар жетеді.
Хабарламаға сәйкес, Астана қаласының арнайы мамандандырылған 3 құтқару бөлімшесі жіберілген. Тиісінше, 15 қызметкер жіберіледі және 2 минуттан кейін жедел жәрдем стансасына, полицияға, сондай-ақ өзара әрекеттесу қызметіне хабарланады.
Өрт бөлімшесі мен оқиға болған жер аралығы, Юрий Ильиннің айтуынша, шамамен 4 километрді құрайды. Екі аралықты жүріп өту уақыты - 7 минут. Ал, қала құрылысын ескерсек, 10 минутқа дейін созылады. Өрт шамамен 30 шаршы метр аумақты қамтыған.