Бейсенбі, 17 мамыр 2012 7:45
Дәрігерлер қабылдауына келген халық көп
«Саламатты Қазақстан» пойызының еліміз облыстарына шығып, тұрғындардың денсаулығын тексеру жұмыстарын бастағанына біршама уақыт болды. Сәуірдің ортасында пойызды Есіл стансасынан күтіп алып, біздің дәрігерлер жұмыс эстафетасын қолына алған болатын. Қостанайлық дәрігерлер содан бері пойыз үстінде. Есілден Қостанай облысының Сарыкөл елді мекеніне жеткенге дейін «Саламатты Қазақстан» пойызы 13 стансаға тоқтайды екен. Қазір дәрігерлер Жаркөл стансасында тұрғындарға қызмет көрсетуде. Тек Жаркөл емес, сол айналадағы ауыл мен село тұрғындарының тайлы-таяғына дейін «доңғалақты емханаға» келді.
Бейсенбі, 17 мамыр 2012 7:45
Дәрігерлер қабылдауына келген халық көп
«Саламатты Қазақстан» пойызының еліміз облыстарына шығып, тұрғындардың денсаулығын тексеру жұмыстарын бастағанына біршама уақыт болды. Сәуірдің ортасында пойызды Есіл стансасынан күтіп алып, біздің дәрігерлер жұмыс эстафетасын қолына алған болатын. Қостанайлық дәрігерлер содан бері пойыз үстінде. Есілден Қостанай облысының Сарыкөл елді мекеніне жеткенге дейін «Саламатты Қазақстан» пойызы 13 стансаға тоқтайды екен. Қазір дәрігерлер Жаркөл стансасында тұрғындарға қызмет көрсетуде. Тек Жаркөл емес, сол айналадағы ауыл мен село тұрғындарының тайлы-таяғына дейін «доңғалақты емханаға» келді. «Саламатты Қазақстан» пойызында жабдықталған медициналық құралдар ауылды жерлердегі ФАП-тар түгілі ауруханалардың өзінен табыла бермейді, егер бар болса оны жүзеге асыратын маман жоқ. Ал жылжымалы емхана тұрғындарға әрі жан-жақты медициналық тексерістен өтуге әрі оны жедел атқаруға өте қолайлығын көрсетті. Жаркөлден бізге хабарласқан дәрігерлер денсаулығын тексертуге келген тұрғындардың өте көп, кезектің ұзақ екенін айтып отыр.
Біздің аурухана дәрігерлері «Саламатты Қазақстан» пойызымен мұның алдында да сапарға шыққан болатын. Сондықтан олардың «жылжымалы емхана» жағдайында жергілікті тұрғындарға медициналық қызмет көрсетуде тәжірибесі де молығып келеді.
Қазір пойызда барлығын қосқанда 25 дәрігер мен мамандар қызмет көрсетуде. Жақында қаралуға келген бір әйел пойыздан бірден ауруханаға жөнелтілді, оған осында жедел операция жасалды. Ал қаншама адамдардың осы кезге дейін байқалмай келген сырқаттарын анықтап, олар емдік шара алуды да бастап кетті.
Жылжымалы мұндай медициналық қызметтің артықшылығы көп екенін дәрігерлер де, жұртшылық та түсінді. Ол үшін халықтың алғысы ерекше. Державин стансасынан Жаркөлге дейін дәрігерлердің қабылдауында 4897 адам болған, оның арасында 506 бала бар. Ауыл адамдары УЗИ, рентген аппараттарынан, лабораториялық тексерістен өткеніне қуанышты. Әдетте, УЗИ-ден өту үшін кейде кісінің бір күн уақыты кетеді. Ал пойызда әр адам санаулы сағаттың ішінде медициналық барлық тексерістен өте алады.
«Саламатты Қазақстан» медициналық көмек пойызы халқымыздың мықты, мемлекетіміздің күшті болуы үшін жасалып жатқан игі шаралардың бірі екені даусыз.
Енді алдағы бір-екі күнде «Саламатты Қазақстан» облыстың Сарыөл ауданындағы осы аттас стансасына келеді. Онда дәрігерлер екі күн дамыл таппай жұмыс істейтін болады. Тиімділігі мол жылжымалы емхананы онда да тұрғындар асыға күтіп отыр.
Қаратай ЖАЙСАҢБАЕВ,
Қостанай темір жолы ауруханасының бас дәрігері.
Қостанай.