Сейсенбі, 24 сәуір 2012 6:59
ОЛЛАНД – БІРІНШІ ТУР ЖЕҢІМПАЗЫ
Жексенбіде Францияда өткен президенттік сайлаудың бірінші турының қорытындысы бойынша 28,61 пайыз дауыс жинаған социалист Франсуа Олланд алдыңғы орынға шықты.
27,08 пайыз жинаған қазіргі президент Николя Саркози екінші орында болса, 18,05 және 11,12 пайыз дауыс жинаған Марин Ле Пен мен Жан-Люк Меланшон тиісінше, үшінші және төртінші орындарды иеленді. Сайлаушылардың сайлау учаскелеріне келуі 80,43 пайызды құраған. Бұл бюллетеньдердің 99,9 пайызы өңделгеннен кейін белгілі болып отырған мәлімет. Түпкілікті нәтижелер сәрсенбі күні жергілікті уақытпен 20.00-ге дейін белгілі болуы тиіс.
Сейсенбі, 24 сәуір 2012 6:59
ОЛЛАНД – БІРІНШІ ТУР ЖЕҢІМПАЗЫ
Жексенбіде Францияда өткен президенттік сайлаудың бірінші турының қорытындысы бойынша 28,61 пайыз дауыс жинаған социалист Франсуа Олланд алдыңғы орынға шықты.
27,08 пайыз жинаған қазіргі президент Николя Саркози екінші орында болса, 18,05 және 11,12 пайыз дауыс жинаған Марин Ле Пен мен Жан-Люк Меланшон тиісінше, үшінші және төртінші орындарды иеленді. Сайлаушылардың сайлау учаскелеріне келуі 80,43 пайызды құраған. Бұл бюллетеньдердің 99,9 пайызы өңделгеннен кейін белгілі болып отырған мәлімет. Түпкілікті нәтижелер сәрсенбі күні жергілікті уақытпен 20.00-ге дейін белгілі болуы тиіс.
ҚАҚТЫҒЫС ТЫЙЫЛАР ЕМЕС
Хеглиг өңірі үшін көршілес Суданмен болған қақтығыс салдарынан Оңтүстік Суданның 1,2 мыңға жуық азаматы қаза тапқан.
Бұл туралы Оңтүстік Судан армиясының қолбасшысы Камал Маруфтің мәлімдемесіне сілтеме жасай отырып, Франс-пресс агенттігі хабарлаған. Оңтүстіксудандық армияның шегінгеніне қарамастан, көршілес мемлекет билігі Бентиу қаласына әуеден шабуыл жасауды жалғастыра берген көрінеді. Осылайша базарға және қаладағы орталық көпірге бомбалар тасталған. Оңтүстік Судан бұл бомбалауларды арандату ретінде қабылдап отыр.
ҚЫЛМЫСКЕР ӨКІНІШ БІЛДІРДІ
Норвегиялық терроршы Андерс Брейвик кездейсоқ өтіп бара жатқан адамдардың қаза тапқанына өз өкінішін білдірген.
Ол сотта ісі қаралып жатқан кезде өткен жылдың 22 шілдесінде Ослоның үкіметтік кварталында жасырылған бомбаның жарылысынан қаза тапқандар мен зардап шеккендердің туған-туыстары алдында кешірім сұраған көрінеді. Сонымен бірге, ол Утойя аралында Жұмысшылар партиясының жастар лагеріне қатысушыларды өлтіргені үшін кешірім сұрай қоймаған. Брейвик осы қылмыстардың бәрін саяси көзқарасына орай жасағанын тағы да атап көрсеткен.
ҰШАҚ ҚҰПИЯСЫ АШЫЛЫП ҚАЛДЫ
Ирандық мамандар америкалық RQ-170 «Сентинел» ұшқышсыз ұшатын аппараттың жұмыс тәсілін ашып, құпиясын анықтап алған.
Айта кету керек, бұл ұшақты әскерилер өткен жылдың желтоқсан айында қолға түсірген болатын. «Ислам революциясының сақшылары» корпусының аэроғарыш бөлімінің басшысы генерал Амир Али Хаджизаденің хабарлауынша, ирандық мамандар қазір ұшақтың дәлме-дәл көшірмесін жасауға кіріскен көрінеді. Сонымен бірге, ирандық инженерлердің ұшқышсыз ұшатын аппараттың жүйелеріне жазылған ақпаратты қалпына келтірумен айналысып жатқаны да белгілі болып отыр.
АТАСЫ ҮШІН АЙЫПТЫ БОЛДЫ
Обаманың басты қарсыласы, АҚШ президенттігінен үміткер Ромниге оның атасы бірнеше әйел алған деген айып тағылып отыр.
Массачусетс штатының бұрынғы губернаторына бұқаралық ақпарат құралдары алдында өз атасының полигамист болмағандығы туралы айтып, ақталуға тура келген. Мен әкем және анам, бірнеше аға-інілерім мен бір қарындасым болған отбасында өстім. Олар Мексикада тұрды және менің білуімше, өз өмірлеріне риза болатын деп атап көрсеткен ол. Сонымен бірге ХІХ ғасырда мормондар үшін көп әйел алудың дағдылы көрініс болғаны да мәлім болып отыр.
ҚҰРБАНДАРҒА ЕСКЕРТКІШ ОРНАТЫЛДЫ
Польшаның Закопане қаласында Смоленск түбінде құлаған Ту-154 ұшағы апатының құрбандарына ескерткіш ашылды.
Костел алдына орнатылған ескерткішке барлық қаза тапқандардың аты-жөндері ойып жазылған көрінеді. Рәсімді епископ Дамиан Мускус ашқан. Іс-шараға қаза тапқандардың барлығының отбасыларының шақырылғанына қарамастан, салтанатқа келе алмағандар да бар екен. Айта кету керек, ішінде ел президенті Лех Качиньски болған үкіметтік авиалайнердің апатқа ұшырауы Польша үшін ұлттық қайғы-қасіретке айналып отыр.
КӨРШІЛЕРІНЕ ҚЫР КӨРСЕТТІ
КХДР басшылығы зымыран ұшырғанын сынағанына жауап ретінде арнайы операция жүргізетінін айтып, Оңтүстік Кореяға қыр көрсетті.
Солтүстік Корея қажет болған жағдайда өз жауларының күлін көкке ұшыратынын мәлімдеген. 13 сәуірде КХДР ұшырған зымыран сәтсіздікке ұрынған еді. Ол ел үшін 850 миллион долларға түскен көрінеді. Сеул болса осынша қаржыны қару-жараққа емес, өз халқын тамақтандыруға неге жұмсамайды деп сынаған болатын. Пхеньянның ренішін тудырып отырған да осы сөз.
ИЗРАИЛЬ ҮМІТІН ҮЗБЕК ЕМЕС
Израиль сыртқы істер министрі Авигдор Либерман осы елге табиғи газ жеткізіп беру туралы ұзақ мерзімді келісімді тоқтату жөніндегі Египет шешіміне сабырмен қарауға шақырып отыр.
Саясаткер бұл даудың бизнесте кездесетін кез келген даулар тәрізді шешім табатынынан үмітті. Біз Египетте болып жатқан жағдайларды мұқият бақылап отырмыз, жағдайдың жақсы жаққа қарай бағыт алатынына сеніміміз мол, деп атап көрсеткен Либерман. Сондай-ақ ол әзірге оң өзгерістердің болмағанына қарамастан, асығыс шешім шығарудың қажеті жоқ екеніне де назар аударған.
Интернет материалдары негізінде әзірленді.