Солтүстік Қазақстан облысының тумасы, «Отан» орденінің иегері Арыстан Жұнысов Елбасының атқарған істерін айтып, қабылдаған шешіміне қатысты пікір білдірді.
Елбасы Нұрсұлтан Назарбаевтың мемлекетіміздің аса маңызды тарихи сәтінде халыққа қайрылып, үндеу жариялауы отбасымыз үшін күтпеген шешім болғанын жасырмаймын. Шыны керек, бастапқыда сенер-сенбесімізді білмей бір-бірімізге қараған күйі дағдарып қалғанымыз рас. Көңілімізде қимастық сезім пайда болып, тіпті келіншегім көзінің жасына ерік берді. Мен болсам Нұрсұлтан Әбішұлымен танап басында алғаш кездескен кезімді, саяси ерік-жігерге толы сұңғыла саясаткерлігімен, іске мығымдылығымен, уәдеге беріктігімен, қалың бұқараны соңына ілестіре білетін көшбасшылық болмысымен тәнті еткен қасиеттерін еске алдым. «Қазақстандықтардың әл-ауқатының өсуі: табыс пен тұрмыс сапасын арттыру» Жолдауында мынандай жолдар бар: «Біз ауылдық жерлердің әлеуметтік ортасын жаңғыртуға кірісуіміз қажет. Бұған арнайы «Ауыл – ел бесігі» жобасының іске қосылуы септігін тигізеді. Бұл жоба арқылы өңірлердегі еңбекке қатысты идеологияны ілгерілетуді қолға алу керек». Кез келген істің бағасы салыстыру арқылы білінеді. Үндеуде айтылғандай Кеңес Одағы құлап, саясатымыз бен экономикамыз шатқаяқтап қалғанда ел тізгінін Нұрсұлтан Әбішұлына сеніп тапсырдық. Таңдаудан қателеспегеніміз құдіретті уақыттың еншісінде. Мысалды алыстан іздемейік, бір кездері тараудың аз-ақ алдында тұрған Бексейіт, Міңгесер ауылдарының бет-бейнесі бүгінде адам танымастай өзгерген. Ырысымыздың молайып, табысымыздың еселене түсуіне Елбасымыздың көрегенді ауылшаруашылық саясаты арқылы жеткеніміз айдай шындық. Егіншілікпен бірге мал шаруашылығымен де айналысамыз. Жұмыссыз жүрген жастар жоқтың қасы. Жыл өткен сайын елді мекендердің іргесі қалыңдап, тұрмысының сапасы артып келеді. Бүгінгі таңда серіктестікте 235 адам жұмыс істейді. Бексейіт ауылындағы орта мектепке спорт залы салынып, білім беру мекемесінің екіқабатты ғимаратына жаңа пластикалық терезелер орнатылды. Заманауи шағын орталық, балаларға арналған жазғы ойын-сауық алаңы, жастар үйі бой көтерді. Елді мекеннің көшелері жарықтандырылған. Енді су тарату желілерін салу жоспарланған. Қазақылықтың қайнар бұлағы – қасиетті ортаның қаймағы бұзылмай сақталып қалуына қол ұшын беріп, ауылдықтардың тұрмыс-тіршілігін үнемі назарда ұстаған Президентімізге біз шынайы ризамыз!
Елімізді отыз жыл бойы үздіксіз басқарып, Қазақстанды бүкіл әлемге танытып, мойындата білу кез келген лидердің қолынан келмесі анық. Президент ретіндегі өкілеттігін тоқтату туралы шешімі төбемізден жай түскендей болса да, ертеңге, халыққа, жастарға деген сенімі дұрыс жолмен келе жатқанымызды айғақтайды. Мықты ұлттық мемлекет құрып, қазақстандықтардың бір-біріне деген қылаусыз достығын сүттей ұйыта білген Елбасымыз қашанда бізбен бірге!