Бізге жеткен аңыз айтады, сонау 1775 жылы Ереймендегі Қоржынкөл басындағы қанжығалы Бөгенбай батырдың ауылы Сілеті өзенінің бойындағы жайлауына көшеді. Киікбай өзекшесін қиып өткен соң батырдың дәм-тұзы таусылып, 98 жасында дүниеден озса керек. Бұл кезде Абылай хан Омбы жағында сапарда болыпты. Хан жеткенше жуан қарағай бөренелерден биік сөре жасап, мәйітті былғарыға орап сақтаған деседі. Бөгенбай сөресі аталуы содан. Ел қорғаған ерен еңбегін ескерген көдедей қалың ел Абылай ханнан Бөгенбайдың денесін Түркістанға апарып жерлеу туралы жарлық айтуын өтінеді. Батырдың ажалын Абылай ханға естірткен Үмбетей жырау:
О, жамағат, жамағат,
Қаз дауысты Қазыбек,
Шақшақ ұлы Жәнібек,
Қаракерей Қабанбай,
Қанжығалы Бөгенбай,
Үшеуі батыр, бірі би,
Тәңірім берген сондай сый
Сол төртеудің біреуі –
Батырың өлді Бөгенбай!, – деп өзегі өртене жырлапты.
Хан халықтың тілегін екі етпеген. Батырдың немере інісі Адай бас болып, балалары Тұранәлі, Тұрымбет, Арғынбай, Жылқыбай бастаған қырық кісі жерлеп қайтады.
1991 жылы мамыр айында батырдың туғанына 300 жыл толуына орай Бөгенбай сөресі деп аталатын жерге ескерткіш белгі қойылады. Ескерткіш орнатқанда, «Бұл жерде 1775 жылы қазақтың қамал қорғаны болған батыр Бөгенбай қайтыс болған» деген жазуы бар тақтайша орнатылған. Кейін 2009 жылы Түркістандағы Қожа Ахмет Ясауи мавзолейінің ауласындағы бейіттен топырақ алдырып, ескерткіш табанына көмілген.
Батыр стелласы 1991 жылдың маусым айында Ерейментау қаласының кіреберісіндегі жолбарыс жонды төбеге орналастырылған. Мырышпен қапталған металл құрылғыдан тұрады. Жоғарыға қарай өрлеген найзалары, жалпақ қалқандары бар үш бөлімді композиция үш жүздің бір шаңырақ астында жиналғанын бейнелейді. Белгінің жалпы биіктігі 3,6 метр. Етегі ерлік туралы аңызға толы Ерейменнің биігінде Бөгенбай батырдың стелласы зәу биіктен кейінгі ұрпаққа ел мен жерді қорғау парыз екендігін меңзеп тұрғандай.
Ақмола облысы,
Ерейментау ауданы