Ал бұл туралы Орталық сайлау комиссиясының мүшесі Зәуреш Баймолдина түсіндіріп өтті. Оның айтуынша, 2019 жылғы 6 мамырдан Орталық сайлау комиссиясы 4 халықаралық ұйымнан 45 байқаушыны аккредиттеген. Аккредиттеуге ұсыныстардың түсуіне байланысты ол мәліметтер өз уақытында жаңартылып отырады. Шет мемлекеттер мен халықаралық ұйымдардың байқаушыларын аккредиттеуді Орталық сайлау комиссиясы 2019 жылғы 3 маусым күні 18.00-ге дейін жүзеге асырады. 2019 жылғы 8 мамырда Сыртқы істер министрлігінің Еуропадағы қауіпсіздік және ынтымақтастық ұйымының Демократиялық институттар және адам құқықтары бюросы миссиясынан 22 ұзақ мерзімді байқаушыны аккредиттеуге ұсыныс түскен. Олардың барлығы аккредиттелуге шығарылып отыр. Осының бәрін ескере отырып биылғы 7 мамырдан 13 мамырға дейін ұсынылған байқаушыларды қамтитын халықаралық ұйымның байқаушыларын аккредиттеу жөнінде Орталық сайлау комиссиясы «Қазақстан Республикасындағы сайлау туралы» 1995 жылғы 28 қыркүйектегі Қазақстан Республикасы Конституциялық заңы 12-бабының 1-тармақшасына, 20-2-бабына сәйкес тиісті қаулы жобасын дайындады.
З.Баймолдина сондай-ақ бүгінгі күні Сыртқы істер министрлігіне сайлауды жария ету мақсатында 25 шетелдік БАҚ-тың 66 өкілі өтініш бергенін, олардың 37-сі аккредиттелгенін атап өтті. Жалпы алғанда, Сыртқы істер министрлігінде тұрақты немесе 28 шетелдік бұқаралық ақпарат құралының 94 журналисі аккредиттеліпті. Ал қазіргі уақытта 67 халықаралық байқаушы аккредиттеліп үлгеріпті.