Елбасының бес әлеуметтік бастамасы аясында жыл сайын бөлінетін 54 мың грантқа қосымша 2018-2019 оқу жылында тағы 20 мың грант бөлінді. Оның 11 мыңы техникалық мамандықтар бойынша бакалаврлық білім беруге тиесілі. Бұл төртінші өнеркәсіптік революция жағдайындағы жаңа экономикада зор сұранысқа ие болатын мыңдаған жаңа маманды даярлауға мүмкіндік береді. Яғни, инженерлер, ақпараттық технология, робот техникасы, нанотехнология саласына қажетті мамандар даярланады.
Бұл – жастарға жасалған мемлекет қамқорлығының айқын көрінісі. Сонымен бірге техникалық және ауыл шаруашылығы мамандықтары бойынша барлық жоғары оқу орындары гранттарының құны ұлттық жоғары оқу орындарының гранттары деңгейіне дейін көтерілді.
Облыстық білім саласын бақылау департаментінің басшысы Ерлан Қарабалаевтың айтуынша, өткен жылдың I жартыжылдығында 4 техникалық және кәсіптік білім беру, 11 жалпы орта білім беру және 5 мектепке дейінгі білім беру ұйымдарына ішінара тексеру жүргізілген. Тексеру қорытындысымен барлық 20 білім беру ұйымына әкімшілік іс қозғалып, әкімшілік айыппұлдар салынды. Сонымен қатар аталған білім ұйымдарының қорытынды актілеріндегі мәліметтер ұлттық білім беру деректер қорына енгізілген мәліметтермен сәйкестендірілді. Басқосуда облыстағы орта мектеп және жоғары және орта арнаулы оқу орындары жетекшілері де атқарылған жұмыстарды жан-жақты баяндады.
– Соңғы екі жылда облыс әкімдігінің қолдауымен 6 колледждің оқу ғимараттары, оқу-өндірістік шеберханалары мен жатақханаларына күрделі, ағымдағы жөндеу жұмыстары жүргізіліп, пайдалануға берілді. Ағымдағы жылы жергілікті бюджет қаржысы есебінен 429 млн теңгеге Қармақшы ауданындағы аграрлы-техникалық колледжінің жатақханасына күрделі жөндеу жұмыстары жүргізілмек. Жалпы, жатақханаға қажеттілік 1375 орынды ғана құрап отыр, – деді облыстық білім басқармасының басшысы Майра Мелдебекова.
Бүгінде, облыста 10772 студент білім алып отырған 3 жоғары оқу орны, 20985 студенті бар 29 колледж жұмыс істейді. Соның ішінде 11 колледждің студенттеріне 1375 орынды қамтитын және Қызылорда медициналық жоғары колледжіне қосымша 1 жатақханаға қажет.
– Жалпы, 2018-2019 оқу жылы бойынша университеттің күндізгі бөлімінде 3345 студент білім алады. Оның 607-сі гранттық негізде оқиды. Облыс әкімінің гранты бойынша 361 студент білім алуда. Бұл грант өңірдегі білім, экономика, мәдениет, электрэнергетикасы, ақпараттық жүйелер және тағы басқа салаларды кадрлық әлеуетпен қамтамасыз ету мақсатында сұранысқа ие мамандықтарға бөлініп отыр, – деді Қорқыт ата атындағы Қызылорда мемлекеттік университеті ректоры Бақытжан Әбдікәрімов.
Қызылорда облысы