7 маусымда премьер-министр орынтағымен қатар ол биліктегі Консервативтік және Юнионистік партиялар көшбасшылығынан да кетеді. Өзінің мәлімдемесінде Тереза Мэй Ұлыбритания ханшайымын да өз шешімімен толық хабардар еткенін айтты.
Премьердің отставкаға кету себебі Ұлыбританияның Еуропаның одақтан шығу туралы келісімді парламентке мақұлдата алмағандығы болып отыр. Brexit шарттары туралы келісім депутаттар тарапынан ғана емес премьердің өз кабинетінің мүшелері тарапынан да табанды қарсылыққа ұшырады. «Осы келісімді мақұлдату үшін мен парламентшілердің алдында қолымнан келгеннің бәрін жасадым. Бірақ өкінішке қарай үш рет ұсынсам да бәрібір оны өткізе алмадым. Сондықтан мен елдің мүддесі үшін бұл жұмыспен жаңа премьер-министр айналысса дұрыс болатын шығар деген шешімге келдім», деді Тереза Мэй өзінің мәлімдемесінде. Сонымен бірге ол Англияны Еуроодақтан алып шыға алмағанына өкініш білдірді. «Енді референдумның нәтижесіне құрметпен қараудың амалын табу менің ізбасарымның міндеті болады» деді ол. Мәлімдемесін аяқтағанда ол көзіне жас алып, дауысы дірілдеді. Әсіресе «мен өзім шексіз сүйетін еліме қызмет еткенімді мақтан тұтамын» деген сөздері оның көңілін босатқандай болды.
Айта кететін болсақ, Тереза Мэй – Ұлыбританияның Маргарет Тэтчерден кейінгі екінші әйел премьер-министрі. 1956 жылы туған ол 2016 жылдың 13 шілдесінен Дэвид Кэмеронның орнына премьер-министр болып сайланған еді. Т.Мэй Ұлыбританияның ЕО-дан шығу туралы референдумында Brexit-ке қарсы болған адамдардың бірі. Алайда Д.Кэмерон отставкаға кеткенде өзінің кандидатурасын Консервативтік партияның көшбасшылығына ұсынып, билікке өткен. Биліктегі партия осы болған соң Т.Мэй премьер-министрлікке да сайланған болатын.