Атап айтқанда, облыс орталығы аумағында №150 учаске сақадай-сай жабдықталды. Мұнда 9 маусым күні 325 619 сайлаушы дауыс береді деп күтілуде. Біз осы саяси науқанға тыңғылықты әзірлік жасай білген №60 жалпы орта білім беретін мектепте орналасқан №531 сайлау учаскесіне барғанымызда, 2755 сайлаушының тізімі ұқыпты түрде жинақталғанына куә болдық.
Оның ішінде 7 жас сайлауға тұңғыш рет қатысып, дауыс бергелі отыр екен. Учаске шеңберіне кіретін 6 мүмкіндігі шектеулі жанға да дауыс беру үшін ыңғайлы әрі қажетті жағдайлар жасалыпты. Жасы ұлғайған қарияларға қатысты да дәл осылай деуіміздің жөні бар. №531 сайлау учаскесінің төрағасы Абзал Тәжімішев бізге сайлау науқанына әзірлік жұмыстарының қорытындылары және сайлаушылардың бүгінгі ынта-жігері мен өршіл көңіл күйі жөнінде айтып берді.
Аталған сайлау қосынымен іргелес №532 сайлау учаскесінде де жинақылық пен ұқыптылықтың оң көріністері бірден байқалды. Мұнда 2975 сайлаушы тіркелсе, денсаулық жағдайына байланысты алты адамның үйінен дауыс беру үшін барлық мүмкіндік туғызылыпты. Тағы бір айта кетерлік жайт, аталған сайлау учаскелері дауыс беруге алғашқылардың легінде азаматтық парыздарын атқаруға келген 100 адамға арнайы сыйлық тапсыруды көздеп отыр екен.
Міне, президенттік сайлау өткізілетін күн де есік қағып тұр. «Іске сәт» деп осындайда айтылса керек. Ақтөбе