Ерлікке тағзым

Марапаттау алдында Мемле­кет­тік әнұран орындалды. Одан кейін Бас штаб бастығы – ҚК ӘҚК бас қолбасшысының бірінші орын­басары генерал-майор Н. Мұқа­нов әскерилер алдында Қазақстан Президентінің «Адам өмірін құтқарумен байланысты экстре­малды жағдайда танытқан батыл­дығы мен қайсарлығы үшін кіші сержант Ерлан Райымқұлов «Ерлі­гі үшін» медалімен, өз өмі­рін қия отырып, адамды құтқару кезінде көрсеткен ерлі­гі мен жан­қиярлығы үшін «Төтенше жағ­­дайдағы ерлігі үшін» төс­бел­гі­­сімен марапаттала­ды» деген Жар­лығынан үзінді оқып берді. 

Әуе қорғанысы күштерінің бас қолбасшысы, авиация генерал-майоры Н. Кәрбенов кіші сержант Ерлан Райымқұловтың марапатын марқұмның отбасына табыс етті.

– Ерланның батыл ерлігі әрбір қазақстандық үшін үлгі. Себебі жан­қиярлық пен батылдықты қыз­­­меттік міндетті орындау ке­зін­­де ғана емес, сонымен бірге кез келген өмірлік жағдайда та­ны­туға болады. Ерлан қиын кезде өз таңдауын жасады. Оның таң­да­уы мен жасаған әрекеті батып бара жатқан балаға өмір сыйлаған мақ­тан тұтарлық әрекет болды. Мұны әсте ұмытуға болмайды. Өзі­нің ерлігімен ол қазақстандық әс­кери қызметшінің Ар-намыс ко­дексіне сай әрекет етті, – деген ӘҚК бас қол­басшысының орынба­са­ры, авиация генерал-майоры Т.Қойшықұлов, сондай-ақ осындай өне­гелі тәрбие бергені үшін қаза бол­ған әскери қызметшінің анасына зор алғыс білдірді. 

Өз кезегінде, кіші сержант Е.Райымқұловтың анасы Ризагүл Назар­бекова әскери ведомство басшылығына көрсетіліп жатқан моральдық және материалдық қолдауы, қайғы-қасіретке душар болған туған-туысқандарының жарасын жеңілдетіп жүргендері үшін алғысын білдірді. 

Естеріңізде болса, қайғылы оқиға 10 мамырда Нұр-Сұлтан қала­­сында тапа-тал түсте «Газ­ма­ш­ап­па­ратура» бау-бақша ауда­нын­да болған еді. Судағы итіне қарай ұмтылған

12 жасар қыз бала суға қарғиды. Бірақ жет­кін­шекті екпіні қатты қызыл су итімен қоса ағыза жөнеледі. Мұны кездейсоқ көріп қалған кіші сержант Е.Райымқұлов суға ойлан­бастан секіреді. Алайда әскери қызметшінің өзі судан шыға алмай қалады. Сөйтіп айтып келмейтін ажал Ерланның өмі­­рін қиып, көзсіз ерлік көр­сет­кен марқұмның артында әйелі мен кәме­летке толмаған екі баласы қал­ды. 

Әріптестері Ерланның ерлігі бұл әскери қызметшілер үшін ғана емес, барша қазақстандықтар үшін де жанқиярлық пен қай­сар­лық­тың үлгісі екендігін айтады.

«Ол өз қызметін жақсы көрді және өз ісінің нағыз маманы болды. Жоғары жауапкершілік, тәр­тіптілік, әскери қызметке адал­ды­ғымен үнемі ерекшеленді. Жауын­герлік және мемлекеттік-құ­қық­тық дайындық пәндері бойынша керемет нәтижелер көр­сетті, оған сеніп тапсырылған әскери техниканы үлгілі ұстады. Дос­тары мен таныстары оны ашық және өзгелердің проблемала­ры­на бейжай қарамайтын адам ретінде естерінде сақтайды», дей­ді Қорғаныс министрлігінің бас­шы­лығы.