Аталған клубтың отырысына Қазақстан халқы Ассамблеясы Төрағасының орынбасары Жансейіт Түймебаев, Парламент Мәжілісі Төрағасының орынбасары Владимир Божко, Парламент депутаттары, Ақпарат және қоғамдық даму министрлігінің және басқа мемлекеттік органдардың өкілдері, ҚХА мүшелері, республикалық және аймақтық БАҚ бас редакторлары, этносаралық қатынастар саласындағы сарапшылар, ғылыми және шығармашылық қауым мен блогерлер қатысты.
Алқалы жиынның күн тәртібінде Мемлекет басшысының «Сабақтастық. Әділдік. Өрлеу» сайлауалды бағдарламасындағы тапсырмалардың орындалу барысында журналистер қауымы алдында тұрған міндеттер талқыланды. Сондай-ақ қоғамның бірлігін нығайту жөніндегі жұмыстар, соның ішінде Қазақстан халқы Ассамблеясының Түркістан облысы Арыс қаласындағы төтенше жағдайға байланысты көрсетіп жатқан көмегі жан-жақты баяндалды.
Алдымен сөз бастаған Жансейіт Түймебаев жиналған қауымды 28 маусым – Бұқаралық ақпарат құралдары қызметкерлері күнімен құттықтап, шығармашылық табыс тіледі. Сөйтіп Арыстағы тосыннан келген апаттан зардап шеккен тұрғындарға көрсетіліп жатқан гуманитарлық көмек жайында жан-жақты айтып берді.
– Қазақстан халқы қиын-қыстау сәттері жұдырықтай жұмылып, елдік пен бірліктің үлгісін көрсетті. Қазақстан халқы Ассамблеясы да 24 маусымда жедел түрде Шымкент қаласындағы Түркістан облыстық Достық үйінде зардап шеккендер мен Арыс қаласынан көшірілгендерге көмек көрсету мақсатында штаб құрды. Барлық өңірдегі Достық үйлерінде көмек қабылдау пункттері іске қосылды. 27 маусымға дейін Ассамблея көрсеткен көмектің жалпы сомасы 51 млн 331 мың теңгені құрап отыр. Сондай-ақ ҚХА мен «Қоғамдық келісім» мемлекеттік мекемелері бір күндік жалақыларын Түркістан әлеуметтік-корпоративтік даму қорына аударды. ҚХА «Жаңғыру жолы» республикалық жастар қозғалысы «Жақсылық жаса» жобасы аясында Түркістанға көмекке аттану мақсатында волонтерлік топ құрды, – деді Ж.Түймебаев
Бұған қоса ҚХА Төрағасының орынбасары ағымдағы жыл саяси оқиғаларға толы болғанын, сондай сәттерде жағдайды жан-жақты сараптап, халыққа шынайы ақпарат жеткізген төртінші билік өкілдерінің еңбегін атап өтті. Бұл ретте еліміздегі этностардың басылымдары да сүбелі үлес қосуда. Қазақстанда қазір 50-ден аса этностық БАҚ ресми тіркелген. Жыл басынан бері телерадио мен баспасөздерде, ақпараттық сайттарда этносаралық татулық пен келісімге қатысты республикалық және аймақтық деңгейде 7218 материал жарияланған екен.
Журналистер клубының кеңейтілген отырысында Парламент Мәжілісінің депутаты Сауытбек Абдрахманов, «Egemen Qazaqstan» республикалық газеті» АҚ Басқарма төрағасы Дархан Қыдырәлі, «Хабар» Агенттігі» АҚ «Ел арна» телеарнасының директоры Арман Сейітмамыт, «Огни Алатау» Алматы облыстық газетінің бас редакторы Атсалим Идигов, «Қазақпарат» ХАА бас директоры Асқар Омаров, «Коре Ильбо» корей республикалық газетінің бас редакторы Константин Ким тұрақтылық пен келісімді сақтаудағы БАҚ-тың маңызды рөлі туралы ой-пікірлерін ортаға салды.
Шара соңында мемлекет саясатын ақпараттық тұрғыдан қолдауға, қоғамдық келісім мен жалпыұлттық бірлікті нығайтуға, Қазақстан халқы Ассамблеясының қызметін насихаттауға үлес қосқан журналистер мен сарапшыларды марапаттау рәсімі өтті.
Сонымен қатар дәл осы күні Достық үйінде Нұр-Сұлтан қаласы Қазақстан халқы Ассамблеясының XVIII сессиясы өтіп, онда бірінші жартыжылдықта атқарылған жұмыстардың нәтижелері жарияланды. «Халық әл-ауқатының артуы – бірлік пен тұрақтылық кепілі» деп аталған сессия барысында Президенттің «Сабақтастық. Әділдік. Өрлеу» атты сайлауалды бағдарламасына арналған жоспарды іске асыру мәселесі, сондай-ақ Түркістан облысының Арыс қаласына көмек көрсету шараларының жай-жапсары талқыланды.